Неймарга қаратилган «ўқ»ми?

«Ғалаба зиёфатли кечалар билан бирлашолмайди асло». Футбол афсунгарлари юрти раҳбарининг бу сўзи гўёки, Неймарга қаратилган «ўқ» мисоли янг-ради.

Ҳа, Бразилиядек футбол мамлакати президентининг ватандошларини азалий рақиб - Аргентина миллий жамоаси етакчиси Лионель Мессига тақлид қилишга чақиргани кутилмаган ҳолат, албатта. Аргентиналик юлдуз ўз ҳисобига 8-«Олтин тўп»ни ёзиб қўйгач, Лула да Силва чиндан ҳам, кўпчилик кутмаган баёнот билан чиқди. «Фикримча, бразилиялик ёш футболчилар айнан Мессидан ўрнак олишлари керак. Қаранг, Лео 36 (!) ёшда, у жаҳон чемпиони, яна «Олтин тўп»ни ҳам олди ва ҳакозо... Мессини чиндан ҳам, ёшларга фидойилик намунаси сифатида кўрсатиш мумкин. Қайтараман, Лионель болалар учун илҳом манбаи бўлишга лойиқ. «Олтин тўп»ни қўлга киритиш истагидаги ҳар бир футболчи ўзини ишга тўлиқ бағишлаши, профессионал меъёрни ушлаши шарт. Бинобарин, футболда ғалабалар кўнгилхушлик, зиёфат ва турли кечалар билан бирлашолмайди асло. Биламизки, футбол дунёсида кўплар юлдузчалар чақнашади, бироқ улар кейинчалик шунчаки, сўниб қолишади. 17 ёшли болакай катта умид уйғотади, бироқ уни дарҳол сотиб юборишади», — деди Лула да Силва.

Қизиқ, Бразилия футболи бош юлдузи Неймар-чи? Нима, у ўрнак бўлишга лойиқ эмасми? Лула да Силва балки ўз баёноти билан мамлакат футболининг биринчи рақамли юлдузига «ўқ» отишни ўйлагандир... Ҳарқалай, Неймарнинг турли кўнгилочар кечаларда тез-тез кўриниш бериши кўпчиликка маълум.