«Офсайд»ни аниқлашда ярим автомат тизим

Қизиқ, бу техник восита қандай ишлайди? Аввало, айтиш керак, Ла Лигада «офсайд»ни аниқлайдиган янги тизимни 2024|2025 йиллар мавсумидан эътиборан ишга тушириш кўзда тутилган.

Relevo хабарига қараганда, RFEF (Испания футбол федерацияси) яқин кунларда Ла Лига ўйинларини янги тизим билан таъминлаш бў­йича тендер эълон қилади. Ҳозирда масъулиятни ўз зиммасига олишга икки компания даъвогар - Mediapro ва HawkEye. Маълум қилинишича, аслида Ла Лигада жорий мавсумдаёқ «офсайд»ни аниқлаш учун ярим автоматик тизим жорий этиш режалаштирилганди, бироқ RFEFнинг собиқ раҳбари Луис Рубиалес охирги паллада Mediapro компаниясининг тендерда қатнашишига қаршилик қилди. Оқибатда суд муҳокамалари туфайли режа кейинги йилга сурилди ўз-ўзидан.

Айни пайт баҳсли вазиятлар видеотакрорлар ёрдамида кўриб чиқилмоқда, баъзан бош ҳакамнинг шахсан ўзи монитор олдида маълум вақт бош қотирмоқда. Янги тизим ҳаётга татбиқ этилганидан кейин эса ҳаттоки, VAR ҳакамлари ҳам «офсайд» жараёнида қатнашишмайди. Чунки ярим автомат тизим қатъий ҳукм чиқаради. Масалан, теннисда «аут»ни аниқлаши каби...