Охирги 67 йилда илк марта

Ҳар ҳолда, «Ювентус»нинг ҳеч кимни тан олмаслик даври аллақачон тарихда қолди. Ҳозирда «кекса синьора» гегемонияси - ширин хотира туринлик мухлислар учун, албатта. Қолаверса, «А» серияда ўртамиёналар ҳам дадиллашиб, тез-тез сенсацион натижалар кўрсатишмоқда.

Мана, Италия чемпионати элит дивизиони 7-турида 67 йилдан буён кузатилмаган ҳолат рўй берди - азалий гранд клублар - «Ювентус», «Милан», «Интер» ва «Рома» синхрон тарзда мағлубиятни тан олди. Ҳа, Италия футболи белгилари ҳисобланган бу 4та жамоанинг «А» серия бир турида мағлуб бўлиши охирги марта нақ 1955 йили кузатилганди. Аввалги дам олиш кунлари ҳосиласи: 

- Инқироз кўчасидаги «Ювентус» дебютант «Монца» олдида ожиз қолди - 0:1 

- Жозе Моуриньо бошқарувидаги «Рома» Римда «Аталанта»га ютқазди - 0:1 

- Чемпионликка яққол даъвогар «Интер» сафарда «Удинезе»га қаршилик кўрсатолмади - 1:3

- Амалдаги чемпион «Милан» ўз уйида «Наполи»га ютқазди - 1:2.

Асосий факт шуки, «А» серия 7-туридан кейин турнир жадвалининг юқори 4 поғонасида на «Милан» ёки «Интер», на «Ювентус» ёки «Рома» бор.