Рейтинг: Икки «хет-трик» ҳисобига 5-ўрин

 Бу атиги 2та «хет-трик» маҳсулидир. Эътиборлиси, ҳамюртимиз ушбу натижа ортидан Криштиану Роналду ва Карим Бензема билан бир қаторга жойлашди.

Transfermarkt портали 2022 йили Европанинг кучли 5та лигаси, қитъа миқёсидаги турнирлар ва миллий жамоалар ўйинларида энг кўп «хет-трик»ка эришган футболчилар рейтингини тузиб чиқди. Ушбу жадвалда 1-ўринни 2022 йилнинг бош тўп­урари Килиан Мбаппе эгаллади. Франция миллий жамоаси ва «ПСЖ» ҳужумчиси йил давомидаги 56та ўйин­да 5 марта «хет-трик» қайд этган. «Манчестер Сити»нинг норвегия­лик голеадори Эрлинг Холанд ҳисобида 4та «хет-трик» бор. Фарқи шуки, у йил давомида 43та расмий учрашувда майдонга тушган. 3та «хет-трик» ва 2-ўрин - бу Польша термаси ва «Барселона» ҳужумчиси Роберт Левандовскининг натижаси. 

Рейтингнинг топ-10талигига кирган қолган футбочилар номида 2тадан «хет-трик» бор. Италия чемпио­натидаги вакилимиз Элдор Шомуродов улар орасида 5-ўринда. Гап шундаки, ҳамюртимиз 2та «хет-трик» учун 35та ўйин сарфлаган. Миллий жамоамиз ҳужумчисидан 1-поғона юқорига жойлашган Виктор Осимхен («Наполи») эса бу натижага 34та ўйинда эришган. Эслатма, Элдор Шомуродов ҳар икки «хет-трик»ни Ўзбекистон миллий жамоаси сафида расмийлаштирди. У аввалига Осиё кубоги-2023 саралаш босқичидан ўрин олган Мальдив термасига қарши ўйинда ўзини кўрсатганди. Ҳужумчимиз шунингдек, Наманганда ташкил этилган Navruz Cup мусобақасида Уганда термаси дарвозасини ҳам 3 марта нишонга олди.