Рейтинг: Рио-де-Жанейро эмас, Лондон!

Германияда фаолият юритаётган нуфузли гуруҳ футболчилар трансфер суммасини турли ракурслардан ҳисоблашни жуда хуш кўришини яна бир бора исботлади. Диққат қилинг, transfermarkt вакиллари бу сафар энг қимматбаҳо футболчилар қайси шаҳарда туғилишганига эътибор қаратишди. Шу аснода умумий сумма бўйича жаҳоннинг энг қимматбаҳо футболиларига «бешик тебратган» шаҳарлар рўйхати тузилди. Топ-10 шаклидаги рейтингда 1-ўринни Брази­лиянинг қайсидир шаҳри эмас, балки Лондон эгаллади кутилмаганда.

Қўшма қироллик пойтахти - Лондон ва унинг атрофидаги ҳудудларда туғилган амалдаги футболчиларнинг жами трансфер суммаси 1,6 миллиард еврога тенг. Лондон тортиқ этган энг қимматбаҳо футболчи - бу «Арсенал» юлдузи Букайо Сака (130 миллион евро). Биринчи ва иккинчи «футбол шаҳарлари» ўртасидаги фарқ деярли 1 миллиард еврони ташкил этди. Яъни Париж ўз бағрида туғилган футболчиларнинг жами трансфер суммаси бўйича Лондондан анча орқада. Рақамларда айтсак, Франция пойтахтига «тегишли» футболчиларнинг баҳоси - «атиги» 688 миллион евро. Тушунарлики, киндик қони Парижга тўкилганлар орасида «Пари Сен-Жермен» голеадори Килиан Мбаппе 180 миллион евролик ёрлиқ билан мутлақ пеш­қадам.

Жанубий Американинг энг илғор шаҳри - Сан-Паулу фахрли 3-ўринда. Бразилиянинг ушбу футболсевар ҳудудида туғилган амалдаги футболчилар ҳозирда 622 миллион евролик «тош босишяпти». Энг қимматбаҳо маҳаллий тарбияланувчи - «Реал» ҳужумчиси Родриго (100 миллион евро). Рейтингнинг кейинги поғоналари Испания ва Уругвай пойтахтларига тегишли. Мадридда дунё юзини кўрган футболчиларнинг умумий трансфер қиймати 599 миллион евро бўлса, Монтевидео фарзандларига тааллуқли кўрсаткич озгина пастроқ - 582 миллион евро. Кучли 10таликда яна Рио-де-Жанейро (Бразилия, 547 миллион евро), Лиссабон (Португалия, 536 миллион евро), Манчестер (Англия, 436 миллион евро), Бирмингем (Англия, 384 миллион евро) ва Амстердам (Нидерландия, 379 миллион евро) шаҳарлари бор.

Фарзандларининг трансфер суммаси бўйича энг илғор шаҳарлар (топ-5)

1-ўрин. ЛОНДОН (Англия) - 1,6 млрд. евро

Энг қимматбаҳо футболчилар: Букайо Сака («Арсенал»), Гарри Кейн («Бавария»), Деклан Райс («Арсенал»)

2-ўрин. ПАРИЖ (Франция) - 688 млн. евро

Энг қимматбаҳо футболчилар: Килиан Мбаппе («ПСЖ»), Кингсли Коман («Бавария»), Мусса Диаби («Астон Вилла»)

3-ўрин. САН-ПАУЛУ (Бразилия) - 622 млн. евро

Энг қимматбаҳо футболчилар: Габриэль Жезус («Арсенал»), Габриэль Магальянс («Арсенал»), Маркиньос («ПСЖ»)

4-ўрин. МАДРИД (Испания) - 599 млн. евро

Энг қимматбаҳо футболчилар: Родри («Манчестер Сити»), Маркос Льоренте («Атлетико»), Марио Эрмосо («Атлетико»)

5-ўрин. МОНТЕВИДЕО (Уругвай) - 582 млн. евро

Энг қимматбаҳо футболчилар: Федерико Вальверде («Реал»), Мануэль Угарте («ПСЖ»), Матиас Оливейра («Наполи»)

 А.АҲМЕДОВ тайёрлади