Самвел Бабаян: "Искандеров ва Болтабоев миллий термага мос футболчилар..."

- Аввало, Мустақиллик байрами билан барчани табриклаймиз.
Битта рақибга қарши кетма-кет икки ўйин ҳеч қачон осон бўлмаган. Тан олиш керак, омад бугун биз тарафимизда бўлди. Бугун футболчиларимиз яна 3-4та вазиятда гол киритишлари мумкин эди. Икки жамоа ҳам сифатли ўйин намойиш этди. Айнан мана шундай ўйинлар ўзбек футболининг ривожига хизмат қилади. Хусусан, миллий терма  жамоанинг ўйинларига ҳам ижобий таъсир кўрсатади.

Биз жамоанинг аввалги мавқеини тиклаш  йўлида тўғри бораётганимизни кўряпмиз. Бу  фақат бугунги ўйиндан келиб чиққан хулоса эмас, балки ёш футболчиларнинг «Навбаҳор» сафида ўйнаш иштиёқида клуб мактабларига келаётганидан ҳамда  жамоага нисбатан қарашлар ўзгараётганидан далолатдир.

Вазифаларимиздан бири миллий жамоага ўйинчиларни тарбиялаб, тайёрлаб бериш. Футболчиларимиз миллий термага чақирилиши эса бошқа мавзу. 

Жамшид Искандеров ҳақида гапирадиган бўлсам, уни энг иқтидорли ўйинчилардан бири сифатида миллий жамоанинг айни дамдаги етакчилари – Шомуродов, Машарипов, Шукуров даражасидаги ўйинчи деб биламан. У ўз ўйинлари билан миллий жамоадан чақирув олишга ҳақли. Ўйлайманки, буни миллий жамоа бош мураббийи ҳисобга олган ва уни чақирса керак. Ҳеч кимга босим ўтказмоқчи эмасман, ҳамманинг ўз қараши бор. Искандеров ҳам, Болтабоев ҳам миллий жамоа томонидан эътибор бўлишга лойиқ ўйинчилар...