Статистика: 700 гол тақсимоти

 У аллақачон 8-юзталикни майдалашга ҳам тушди, лекин қуйидаги статистик маълумотлар фақат 700та голи ҳақида.

ТАНА ҚИСМЛАРИ БЎЙИЧА ТАҚСИМОТ

Лионель Месси 26 февраль куни Лига 1 25-тури доирасида бўлиб ўтган «Марсель» - «ПСЖ» (0:3) ўйинида нафақат жамоасининг 3та голида ҳам қатнашди (1та гол ва 2та самарали узатма), балки алоҳида маррани забт этди. Аргентина миллий жамоаси сардори клуб миқёсидаги фаолиятида юбилей - 700-голини Килиан Мбаппе узатмасидан сўнг ўнг оёғи билан урди. Умуман, Лео 100тача голини танасининг ишламайдиган (аниқ ишламайдиганми?) қисмлари воситасида юзага келтирган. 

** Лионель 700та гол марраси йўлида жами 840та ўйин сарфлади. Табиийки, аргентиналик ҳар доим ҳам ўйиннинг бошидан охиригача майдонда ҳаракатланган эмас. Хуллас, ўртача ҳисобда айтсак, унинг майдондаги ҳар 98,4 дақиқалик вақтига 1та гол тўғри келади. 

** Кўпчиликни ягона голлар алоҳида қизиқтирса керак. Демак, Леонинг кўкрак қисмига тўғри келган гол Клублар ўртасидаги ЖЧ-2009да «Эстудиантес»га қарши кечган ўйинда кузатилган. Ла Лиганинг 2007/2008 йиллар мавсумида эса, «Эспаньол» дарвозасига тўпни қўли билан тўғрилаб қўйганди. Сон билан голига келсак, у Испания кубоги-2013/2014да «Хетафе» билан баҳсда рўй берган.

** Месси 700та гол довони йўлида 48та ўйинда 3та ёки кўпроқ гол урган. Аниқроқ айтсак, 41 марта «хет-трик», 6 марта «покер» ва 1 марта «пента-трик» (ЧЛ-2011/2012да «Ба­йер» билан ўйинда) қайд этган.

** Лионель ҳисобида «идеал хет-трик» (чап ва ўнг оёқ ҳамда бош билан гол) йўқ. Лекин соф ўнг оёққа тегишлиси бор - ЧЛ-2014/2015да АПОЭЛ жабр кўрганди.

** Месси қаторасига 10 мавсум давомида 40та гол маррасидан ошган - ушбу ажойиб серия 2009/2010 - 2018/2019 йиллар мавсумлари оралиғида кузатилган.

МАЙДОН ҚИСМЛАРИ БЎЙИЧА 

ТАҚСИМОТ

700та голдан 75таси жарима майдони ташқарисидан берилган зарбалар маҳсули. Жарима зарбаларидан урилган голлар сони эса 52та. Шунчаки, қойилмақом! 

** Лео Месси клуб футболида 110та пенальтининг 84тасидан самара чиқарган.

** Месси фаолиятида ўйиндан урилган гол қўшилмаган «хет-трик» ҳам бор: 2019 йили «Сельта»га қарши ўйинда 2та жарима зарбаси ва 1та пенальтини голга айлантирганди.

ТУРНИРЛАР БЎЙИЧА ТАҚСИМОТ

Криштиану Роналдунинг клуб футболида урган 700та голи ҳақидаги статистик маълумотларда португалиялик уларни қайси либосларда нишонлангани ҳам келтирилганди. Лионель голларини бундай тақсимлашдан маъно йўқ. Чунки 672та голи «Барселона» (778та ўйинда) ва 28таси «ПСЖ» (62та ўйинда)га тўғри келади. Лекин турнирлар бўйича тақсимот анча хилма-хил. 

** Месси Европанинг кучли 5та лигасида 700та гол урган ягона футболчидир. Криштиану Роналду эса Европа клуб футболидаги 701та голидан 5тасини Португалия чемпионатида «Спортинг» учун юзага келтирган.

** Лионель - Испания Ла Лигаси тарихидаги энг яхши тўп­урар (474та гол). Шунингдек, Испания чемпионатининг энг яхши ассистенти мақоми ҳам айнан Леога тегишли (192та). Аргентиналик жумладан, Ла-Лига-2011/2012да 50та гол тўплаганди.

** Испания чемпионатидаги «хет-трик»лар сони бўйича рекорд ҳам Мессига тегишли (36та). У жумладан, мавсум-2011/2012нинг ўзида 8 марта шундай натижага эришган.

РАҚИБЛАР БЎЙИЧА ТАҚСИМОТ

Табиийки, Мессининг энг «қадрдон» ва «севимли» рақиблари Испанияда. Биргина «Севилья» Леодан нақ 38та гол қабул қилиб олган. Иккинчи рақамли «ўлжа» - бу «Атлетико» (32та гол).

 ** Месси - «Эль-класико»нинг энг яхши тўпурари (26та гол). Криштиану Роналду ва Альфредо ди Стефано Испания чемпионатининг бош қарама-қаршилигида 18 мартадан гол қувончини туйишган.

** Лео Месси амалдаги клуби - «ПСЖ»га қарши кечган 10та ўйинда 6та гол уришдан ташқари, бир бора ассистент­лик ролини бажарган. Тўғри, аргентиналик юлдуз Париж жамоаси билан баҳсларда бирор марта ҳаттоки, «дубл»га ҳам эришмаган.

А.АБДУВАЛИХЎЖАЕВ тайёрлади