Тафсилот: Фирибгарлик бўйича айблов...

«Арсенал» ўтган йилнинг 8 декабрь куни АПЛ 18-туридан ўрин олган «Лидс»га қарши ўйинни 4:1 ҳисобида ўз фойдасига ҳал қилди. Ўшанда Микель Артета жамоаси голларига Габриэль Мартинелли (2та), Букайо Сака ва Эмиль Смит-Роу муаллифлик қилишганди. Англияда ушбу мутлақо оддий ўйин ҳамон муҳокама марказида. Ҳаммасига «Арсенал» ярим ҳимоячиси Гранит Жаканинг 86-дақиқада ғалати сариқ карточка олгани сабаб... Швейцариялик футболчи вақт чўзгани учун огоҳлантирилганди.

Кейинчалик маълум бўлишича, ўйин давомида Британия букмекерлик идораларида Жаканинг охирги 10 дақиқада «сариқ» олишига тез-тез катта суммада пул тикилган. Ўта шубҳали ҳолат! Хусусан, ўйинчилардан бири 52 минг фунт стерлинг тиккан. Якунда у чамаси 250 минг фунт стерлинг миқдоридаги ютуққа эга чиққан. Букмекерларни айниқса, футболчи охирги 10 дақиқада огоҳлантирилишига кўп пул тикилгани шубҳалантирган. Шу ўринда айтиш керак, муайян футболчининг сариқ карточка олиши каби ҳодисотларга ўйин тугашига яқин тикилган пул коэффициенти жуда катта бўлади. Гранит огоҳлантирилган вазиятга келсак, унинг рефери Эндрю Марринер сабр-тоқатини атайин синагандек таассурот қолдирганди. 

Англия футбол ассоциацияси ушбу лавҳани 6 ой давомида текширди ва яқинда тўпланган барча маълумотларни Миллий жиноят агентлигига топширди. Энди АПЛ 18-туридан олинган ғаройиб лаҳза мамлакат миқёсида кўриб чиқилади. Эътиборли томони, Жаканинг ўзи ҳали ҳеч қандай сўроққа чақирилмади. Аммо агар шубҳали пул тикиш ҳолатларининг учи Гранитга бориб тақалса, унга жуда қийин бўлади, албатта. Зеро, ҳаттоки, Албания учинчи лигасида ҳам бундай ишлар билан шуғулланиш яхшиликка олиб бормайди…