THE BEST FIFA FOOTBALL AWARDS: Якуний учликлар қандай?

 Яъни ҳар бир номинацияда финалга чиққан трио жамоатчилик эътиборига ҳавола этилди. Хўш, кимларда ФИФА талқини бўйича 2023 йил лауреати бўлиш имконияти бор? Эслатма, The Best-2023 гала-оқшоми 15 январь кунига белгиланган.

Энг яхши мураббий номинацияси

The Best шорт-варақаси якуний учлигидан Хосеп Гвардиола («Манчестер Сити»), Симоне Инзаги («Интер») ва Лучано Спаллетти («Наполи»/Италия термаси) жой олишди. Анге Постекоглу («Селтик»/«Тоттенхэм») ва Хави («Барселона») эса финалдан четда қолишди. Маълумот учун, Гвардиола мавсум-2022/2023да «Манчестер Сити» билан ЧЛ, АПЛ ва Англия кубогида зафар қучган бўлса, Инзаги «Интер»ни Италия кубогида ғалаба ҳамда ЧЛда финалгача етаклади. Спаллетти эса «А» серияда «Наполи»ни узоқ кутилган скудетто сари бошлади.

Энг яхши футболчи номинацияси

2023 йилнинг энг яхши футболчисига аталган ФИФА соврини Эрлинг Холанд («Манчес­тер Сити», Норвегия термаси), Килиан Мбаппе («ПСЖ», Франция термаси) ва Лионель Месси («Интер Майами», Аргентина термаси)дан бирига топширилади 15 январь куни. Ушбу номинацияда топ-12га кирган Кевин де Брюйне («Манчестер Сити»), Бернарду Сильва («Манчестер Сити»), Хвича Кварацхелия («Наполи»), Хулиан Альварес («Манчестер Сити»), Илкай Гюндоган («Манчестер Сити»/«Барселона»), Родри («Манчестер Сити»), Виктор Осимхен («Наполи»), Деклан Райс («Вест Хэм»/«Арсенал») ва Марцело Брозович («Интер»/«Ал-Наср») эса курашдан чиқишди. Айтиш керак, финалчиларни шакллантиришда 2022 йил 19 декабрь - 2023 йил 20 август оралиғидаги натижалар инобатга олинган. Оддий айтганда, ФИФА танловига ЖЧ-2022нинг таъсири йўқ. Эслатма, ўтган йили The Best Лионель Мессига топширилганди.

Энг яхши дарвозабон номинацияси

ФИФА 15 январь куни Ёсин Буну («Се-вилья»/«Ал-Ҳилол», Марокаш термаси), Тибо Куртуа («Реал», Бельгия термаси) ёки Эдерсон («Манчестер Сити», Бразилия термаси)ни 2023 йилнинг энг яхши дарвозабони сифатида эътироф этади. Бунгача кучли бешликдан жой олган Андре Онана («Интер»/«МЮ», Камерун термаси) ва Марк-Андре тер Штеген («Барселона», Германия термаси) даъвогарлар қаторидан тушиб қолишди.

Энг чиройли гол номинацияси

Пушкаш номидаги совринга даъвогар энг чиройли 3та гол ҳам маълум. Демак, бу соврин учун «Брайтон»нинг парагвайлик вакили Хулио Энсисо («Манчестер Сити» дарвозасига урган голи), бразилиялик Гильерме Мадруга («B» серияда урган голи) ва португалиялик Нуну Сантуш («Спортинг» - «Боавиште» ўйи­нида меҳмонлар дарвозасига урган голи) ўзаро кураш олиб боришади.

АЁЛЛАР ФУТБОЛИ БЎЙИЧА

Табиийки, ФИФА аёллар футболи бўйича ҳам The Best мукофотига даъвогар-финалчиларни аниқлади.

Энг яхши мураббий номинацияси

Жонатан Хиральдес («Барселона»)

Эмма Хейз («Челси»)

Сарина Вигман (Англия термаси)

Энг яхши футболчи номинацияси

Айтана Бонмати («Барселона», Испания термаси)

Линда Кайседо («Реал», Колумбия термаси)

Женнифер Эрмосо («Пачука», Испания термаси)

Энг яхши дарвозабони номинацияси

Маккензи Арнольд (Австралия термаси)

Каталина Холл (Испания термаси)

Мери Эрпс (Англия термаси)