Улар энди «Атлетико»га керак эмас

AS нашри хабарига кўра, мадридликлар маошлар фондини қисқартириш мақсадида ёзда тажрибали голкиперни трансферга қўяди ва Облак бўйича таклифларни ўрганиб чиқишга тайёр. Диего Симеоне Ян Облакнинг ўрнига «Валенсия»нинг грузиялик дарвозабони Георги Мамардашвилини олиб келмоқчи. Ян Облак «Атлетико»га 2014 йилда олиб келинган. Словениялик посбон  юлдузлик даврида Европанинг гранд клубларидан чорлов олганди. Бироқ Мадридда қолишни афзал кўрган. Transfermarkt портали 31 ёшли футболчини 30 миллион еврога баҳоламоқда. Шунингдек, нидерландиялик форвард Мемфис Депай ҳам Симеоненинг кейинги мавсумдаги режаларга киритилмаган. Мадрид клуби Мемфис Депай ва аввал хабар қилинганидек, Италия «А» сериясига қайтишни истайдиган испаниялик ҳужумчи Альваро Марата борасидаги таклифларни тинглашга тайёр. Депай 2023 йилнинг январида Мадридга келганди. 30 ёшли ҳужумчининг «матрасчилар» билан шартномаси 2025 йилнинг ёзига қадар мўлжалланган. Жорий мавсумда Депай «матрасчилар» сафида 28та ўйин ўтказиб, 9та гол урди ва 2та голли узатмани амалга оширди.