Юлиан Нагельсманн «Бавария» билан расман хайрлашди.
Мюнхен клуби германиялик 35 ёшли мутахассис билан келишув ўзаро розилик асосида бекор қилинганини эълон қилди. Қайд этилишича, клуб бошқарув кенгаши раиси Оливер Канн, спорт директори Ҳасан Салихамижич ва жамоа президенти Герберт Хайнернинг қарорига кўра, мураббий истеъфога чиқарилган. Маълумот учун, «Бавария» ЖЧ-2022дан кейин «Боруссия» Дортмунд билан орадаги 9 очколик фарқни қўлдан чиқарди ва Бундеслига 25-туридан сўнг Дортмунд жамоаси Мюнхен клубини турнир жадвалида ортда қолдириб, 1-ўринга кўтарилди. Эслатиб ўтамиз, Нагельсманн 2021 йил «Бавария» бошқарувига келганди. У клуб билан 5 йиллик шартнома имзолаб, жамоа бош мураббийи сифатида Бундеслига ва икки марта Германия Суперкубоги ғолиблигини қўлга киритганди.
Мюнхен клуби Нагельсманн ўрнига янги бош мураббий номини ҳам зудлик билан эълон қилди. «Бавария» клуби расмий сайти хабарига кўра, Томас Тухель жамоа бош мураббийи сифатида иш бошлаган. Германиялик 49 ёшли мутахассис билан 2025 йилнинг ёзига қадар келишув имзоланди. Тухель ҳозирга қадар «Майнц», «Боруссия» Дортмунд, «ПСЖ» ва «Челси» клубларида ишлаган. Клуб бошқарув кенгаши раиси Оливер Канн, спорт директори Ҳасан Салихамижич ва жамоа президенти Герберт Хайнернинг қарорига кўра, Тухель Мюнхен жамоасида иш бошлаган. Қайд этиш жоиз, «Бавария» Тухель қўл остидаги дастлабки учрашувни 1 апрель куни ўз уйида принципиал рақиби «Боруссия» Дортмундга қарши майдонга тушади. ЕЧЛ 1/4 финалида эса жамоани «Манчестер Сити» кутиб турибди. Маълумот учун, Тухель мураббийлик фаолияти давомида 10та совринга эга чиққан, хусусан ЕЧЛ бош соврини ва УЕФА Суперкубогида зафар қучган.
