Финалда урилмаган голлар Париж олимпиадасига захира ёхуд InterFUTBOLнинг сешанба сонида
Тан олиш керак, Темур Кападзе ва олимпиячиларимиз кўрсатган натижа(ўйин)ларидан деярли кўнглимиз тўлди.
Буёғига мағлубият ЖЧ билан хайрлашишни англатади. Бор эътибор жаҳон чемпионатига қаратилган экан, газетамиз нигоҳи ҳам турнир атрофидаги воқеликларда, албатта.
ЭҲ, БУ КЎЗ ЁШЛАРИ...
Чинакам кўз ёш тўкиш энди бошланади. Ахир ҳар тўрт йилликнинг бош турниридан чиқиб кетиш осон-ми? Лекин гуруҳ босқичи ўйинлари давомидаёқ бир қанча таъсирли кадрлар юзага қалқиб чиқди.
Жанубий Корея термаси етакчиси Сон Хюн Мин ганаликлар билан ўйин (2:3)дан сўнг. Африкаликлар аламзада футболчини юпатишмоқдами ёки суратга олишяпти...?
«Н» гуруҳи 3-тури якунидаги ҳолат: Луис Суарес (Уругвай)да алам кўз ёшлари, Сон Хюн Минда эса энди қувонч дийдаси...
СЕНСАЦИЯЛАР ГУЛДАСТАСИ
Гуруҳ баҳсларидаёқ қанчадан-қанча сенсацион натижалар кузатилди. Уларни асосан ОФК жамоалари қайд этгани ёқимли, албатта. Айниқса, ФИФА рейтингида 51-ўринни эгаллаб турган Саудия Арабистони жамоаси 3-поғонадаги аргентиналикларни доғда қолдиргани оғир тош босади.
МЕЗБОНЛАРДА ҲАММАСИ АНТИ
Қатар мундиалга кўп ва хўп тайёрлангани аниқ. Аммо мезбон жамоанинг натижаси барчасини қисман ювиб юборди. Ҳар ҳолда, Қатар термаси бир қатор антирекордлар туфайли ЖЧ тарихидаги энг ношуд мезбон мақомини олди.
ИККИ БУЮК НАТИЖА
Аргентина миллий жамоаси етакчиси Лионель Месси ЖЧ тарихида муайян ўйинда ҳам гол урган, ҳам ассистентлик қилган энг ёши катта футболчига айланди. У вақтида шундай натижага эришган энг ёш футболчи мақомини олганди.
ЧИНАКАМ ГОЛЕАДОР
Лионель Мессининг асосий рақобатчиси - Криштиану Роналду эса ЖЧда Португалия миллий жамоаси учун гол урган энг ёши катта футболчи бўлди. У бундан 16 йил муқаддам Португалия термасининг мундиалда гол нашидасини сурган энг ёш вакили сифатида рекорд ўрнатганди.
ИСПАНЧА ДОВУЛ
Испания миллий жамоаси гуруҳ раунди 1-турида Коста-Рика термасини 7та жавобсиз гол билан «сийлади». 7:0 - бу ЖЧ тарихида кузатилган энг йирик ҳисобли ғалабалар рўйхатида 7-натижа. Рекорд эса 1982 йили Венгрия - Сальвадор ўйинида қайд этилган - 10:1.
ЎЗГАРМАС РЕКОРДЛАР-МИ?
ЖЧ тарихида бир қатор рекордлар борки, уларнинг янгиланиши - қийин масала. Масалан, франциялик Жюст Фонтен битта турнирда 13та гол урган. Бунақасини тасаввурга сиғдириш қийин, гарчи ҳозирда моҳир тўпурарлар замонида яшаётган бўлсакда...
