Таниқли агент-оталар

Жорже Мендеш, Пини Захави ва марҳум Мино Райола ўрнини тўлдирган Рафаэль Пиментанинг маҳкамалари бу ишда бош-қошлар. Лекин агент-оталар ёрдамида фаолият юритаётган футболчилар ҳам етарли.

Бисмарк ХАДСОН-ОДОИ 

«Ўзи ҳам футбол ўйнагани боис, юксак савияда тўп суриш учун ҳаётда кўп нарсалардан воз кечиш кераклигини отам яхши билади. Шу сабабли унинг маслаҳатлари, кўрсатмаларини диққат билан тинглайман. Мен қаерда ўйнашимдан қатъий назар, у барча учрашувларга боради. Унинг доимо ёнимда эканлигини ноодатий ҳуштак чалишидан билиб оламан. Бу менга ёрдам беради», - деганди Хадсон,Одои 2019 йилда. 

Катта Хадсон-Одои ўз вақтида Гана Премьер-лигасининг гранди «Хартс оф Оук» клубида тўп сурган. Ўғли порлоқ келажакка умид уйғотган бўлсада, ҳозир бир оз пасайиб қолди. 22 ёшли футболчига Саудиянинг номлари ошкор этилмаган 2 клуби қизиқиш билдирмоқда. Лекин англиялик футболчи Осиё таклифини рад этса керак. Чунки у «Милан», «Ноттингем Форест» ва «Фулхэм» клубларининг назорати остида. Ўтган мавсумни футболчи «Байер»­да ўтказиб, 14та ўйинда битта ассистни амалга оширди. 

Вероника РАБЬО 

2019 йилда Адриен Рабьонинг онаси «ПСЖ»нинг янги шартномага оид 4та таклифини рад этган, параллел равишда «Барселона» билан музокаралар олиб борганди. «Адриен - «ПСЖ»нинг гаровга олинган маҳбуси. Тез орада уни ертўлага олиб тушадилар, қуруқ нон ва сув. Бунинг сабаби шуки, Адриен ўзи ҳурмат қиладиган шартномани бекор қилишни истамади» , - деганди Вероника хоним ғазаб билан. Ўшанда Адриеннинг «Барса»га ўтишига Франки де Йонгнинг каталонияликлар сафига келиши ва футболчи онасининг молиявий талаблари монелик қилганди. Охир-оқибат, Адриен «Ювентус»га йўл олди, Вероника хоним 10 млн. евро бонусга эга бўлди. Турли-туман муаммолардан боши чиқмай қолган бўлсада, Адриен доимо онаси томонида: «Онамнинг футболдаги барча ишлари тўғри. У улкан ҳаётий тажрибага эга. Баъзан кўпчилик, ҳатто ўзим ҳам унинг қарорларини тушуна олмай қоламиз. Лекин барибир, унга 100 фоиз ишонаман. Чунки у доимо ҳақ».  

Катта Хуан МАТА 

Хуан Матанинг отаси жамоатчиликка деярли кўриниш бермайди. Лекин бир қатор савияли футболчиларни жамлаган обрўли агентликни бошқармоқда. Ўз ўғлидан ташқари, у Соломон Рондон («Ривер Плейт»), Адриа Педроса («Севилья») ва Муҳаммад Салису («Саутгемптон») каби футболчилар манфаатларини ҳимоя қилади. Агент Мата ҳам ўз вақтида профессионал футболчи бўлган ва 1980-90-йилларда Испаниянинг камтарин «Бургос» жамоаси шарафини ҳимоя қилганди. Унинг айтишича, кичик Мата 3 марта - «Валенсия», «Челси»да тўп сурган пайтларида ва яқинда «Барселона» таклифларини рад этган экан. 

Ханс РОББЕН 

Арьеннинг отаси ўғлининг «Бавария»га ўтиши устида жуда кўп югурди. Ниҳоят, 2009 йилда уни «Реал»дан 25 млн. еврога харид қилишди. Ханс эса бу хизмати учун 4,5 млн.га эга бўлди. Кейинчалик у Мюнхен гранди билан бир неча марта шартнома муддатини узайтирди. 

Мустафо ОЗИЛ 

2022|23 йиллар мавсумида Месут отаси билан ҳамкорликда ўтказган фаолиятига нуқта қўйди. 10 йил аввал катта Озил Флорентино Перес билан қизғин тортишувлар эвазига ўғлига «Реал»ни «Арсенал»га алмаштириш имкониятини ҳадя этганди. «Пули кўпайиши билан одам ҳалол бўлиб қолавермайди. Перес - ҳалол одам эмас. Улар Месутни барча омадсизликлар сабабчисига, мени қимматбаҳо трансферни орзу қиладиган очкўз отага чиқариб қўйишди. Ўғлим шунчалик нўноқ бўлса, уни нима учун майдонга туширишади?» 

Тьерри АЗАР 

Ака-ука Эден, Торган ва Килиан Азарларнинг отаси 2019 йилда агентлик лицензиясига эга бўлиб, фарзандлари фаолиятини бошқара бошлади. У Эденни, «Реал»га, Торганни «Боруссия Дортмунд»га жойлади. 

Килиан Мбаппенинг ота-онаси 

Франциялик ҳужумчининг фаолияти ота-онасининг измида. Муҳим қарорларни отаси Уилфрид қабул қилади - 2021 йилда Килианга «Реал»га ўтмаслик ва «ПСЖ» билан шартнома муддатини узайтиришни у тавсия этганди. Шунингдек, юрист Дельфин Верхейден ҳам бор: у «Реал»га ўтишни маслаҳат берганди, лекин ҳужумчи отасининг таклифини танлади. Музокаралар бобида Мбаппенинг онаси Файза Ламари фаол. «Челси» скаути Даниэль Бога уни пулемётга қиёслаганди: «Аввалига мен Килианнинг отаси билан гаплашдим. Кейин онаси келгач, ҳаммасини у бошқариши аён бўлди. Клуб вакиллари билан айнан у суҳбатлашди». 

Ўтган йили француз матбуоти футболчининг агентлари «Реал» вариантини рўкач қилиш орқали «ПСЖ»ни манфаатли таклифга мажбур этганликларини аниқлади. Кейин улар «Реал» вакилларига босим ўтказишга уриниб кўришгани маълум бўлди. 

Неймар да Силва САНТОС 

«Менинг майдон ташқарисидаги «кумирим» отам эканлигини доимо айтганман. Барча масалаларда ундан ибрат оламан. Оғир дамларда менга ёрдам бериш учун у тоғни тўнтаришга ҳам қодир» , - деганди Неймар ўз отаси ҳақида. Катта Неймар ўғлининг «Барса» ва «ПСЖ»даги фаолиятидан 100 млн.дан кўпроқ пул ишлаб олди. Ҳужумчининг 2013 йилдаги Испанияга ташрифи 57 млн.га баҳоланганди. Бироқ кейинчалик клуб унинг ота-онасига қўшимча харажатлар қилгани маълум бўлди. Кейинчалик «Сантос» президенти Луис Рибейро сарф-харажатларнинг аниқ миқдорини эълон қилди ва катта Неймар хусусида ёқимсиз фикр билдирди: «Барселона» учун 90 млн.га тушган келишувда Неймарнинг отасига Лондон меҳмонхонасидаги айш,ишратлар учун сарфланган маблағ ҳам бор. Катта Неймар - фақат пулни ўйлайдиган алдоқчи. Масалан, 200 мартадан кўпроқ у ичган кофе учун пулни мен тўладим». 

Ўғлининг рекорд баҳода «ПСЖ»га ўтиши агент-отага 36 млн. евро келтирди. Қўшимчасига, катта Неймар 43,6 млн. учун «Барса» билан судлашди ва яна 6 млн.га эга бўлди. 

Хорхе МЕССИ 
 

Таниқли агент-оталарнинг бири бўлган катта Месси бир неча марта Барселонага боргани ва Лео билан қайтиш ниятида эканлигини таъкидлаганди. Бироқ якунда кичик Месси АҚШга йўл олди. Хорхе ўғлининг ишларига бегоналар аралашишига йўл қўймайди, ҳатто 2017 йилдаги музокарага Леони ҳам чақирмади ва янги шартномани ўзи имзолаганди. Маълумотларга кўра, Хорхе «Барса» билан бўлган келишувлар эвазига 60 млн. евро ишлаган. «Менинг мақсадим , Леонинг ҳаётини енгиллатиш, доимо ёнида бўлиб, бутун эътиборини фақат футболга қаратишига ёрдам бериш», - деганди Хорхе. 

Ота-бола Мессилар ҳаётида ёқимсиз воқеалар ҳам йўқ эмас: 2016 йилда улар солиқларни вақтида тўламаганликлари учун 21 ойга озодликдан маҳрум этилгандилар. Леонинг айтишича, молиявий масалаларни отаси ҳал қилади. Маълум бўлишича, Хорхенинг кирим,чиқим соҳасидаги билими талаб даражасида эмас... 

С.РАҲМОНОВ тайёрлади