Трапп рад қилди, навбат Дубравкага

Инсайдер Никола Скиранинг ёзишича, «Айнтрахт» ва Германия миллий жамоаси голкипери Кевин Трапп инглиз клуби таклифини рад этган. «Юнайтед» энди захира дарвозабони сифатида «Ньюкасл»нинг иккинчи посбони Мартин Дубравкага таклиф юборган. «МЮ» словакиялик дарвозабонни 5 млн. фунтга сотиб олиш шарти билан бир йиллик ижарага олмоқчи. Маълумот учун, Дубравка ўтган мавсум АПЛда 26 ўйинда майдонга тушиб, ўз дарвозасидан 35та гол ўтказиб юборган. Аввалроқ, «Айнтрахт» Трапп учун «МЮ»дан 25 млн. евро сўрагани, инглиз клуби эса захира дарвозабон учун бу нархни жуда баланд деб ҳисоблаётгани ҳақида хабар қилинган эди. Эслатиб ўтамиз, манчестерликларнинг Давид Де Хеадан кейинги иккинчи дарвозабони Дин Хендерсон мавсум олдидан «Ноттингем Форест» аъзосига айланганди.