УЕФА Суперкубоги: фактлар...

By Пўлатов Мухаммадхон 17 Aug, 2023 13 дақиқа ўқиш 286 Кўрилди

0 comments 0 likes

Кечаги УЕФА Суперкубоги баҳсидан кейин бир қатор рекордлар ва ажойиб кўрсаткичлар қайд этилди.

* Сўнгги 11 йилда УЕФА суперкубогида Чемпионлар лигаси ғолиблари 10 марта ғалаба қозона олишган. Кеча ҳам ЕЧЛ ғолиби «Манчестер Сити» Европа лигаси чемпиони «Севилья»ни мағлубиятга учратди. Фақатгина 2018 йилда ЕЧЛни ютган «Реал» Суперкубокда «Атлетико»га ютқазиб қўйган экан (2:4). Қолган 10та ўйинда Чемпионлар лигаси ғолибларининг қўли баланд келган.

* Гвардиола учта турли клуб билан ушбу совринни қўлга киритди. Бунгача хеч қайси мураббий бунақа натижа қайд этмаганди. Аввалроқ у «Барселона» ва «Бавария» билан УЕФА Суперкубогида ғалаба қозонганди. Эслатиб ўтамиз, кеча ўтказилган УЕФА Суперкубоги ўйинида «Манчестер Сити» «Севилья»ни мағлубиятга учратди (асосий вақт 1:1, пен.серияда 5:4).

* Кечаги Суперкубок Гвардиола учун мураббийлик фаолиятидаги 36-соврин бўлди. У ҳисобида 35та соврин бўлган Мирча Луческудан ўтиб кетди ва бу борада 2-ўринни ўзиники қилиб олди. Энг кўп соврин ютиш бўйича Алекс Фергюсон етакчи ҳисобланади. У мураббийлик фаолиятидаги 39 йил давомида 49та соврин ютган.

* Пеп Гвардиола УЕФА Суперкубогини қўлга киритиш бўйича Карло Анчелоттига етиб олди. Энди ушбу турнирда ҳар икки мураббийда ҳам 4тадан соврин бор. Анчелотти Суперкубокда 2003 ва 2007 йилда «Милан» билан, 2014 ва 2022 йилда эса «Реал» билан ғолиб бўлган. Гвардиола эса бунгача икки марта «Барселона» билан (2009 ва 2011), шунингдек «Бавария» билан (2013) бир марта УЕФА Суперкубогида ютган.

* Хорватиялик футболчи Матео Ковачич «Манчестер Сити» сафида УЕФА Суперкубоги ғолиб бўлди. У учта клуб билан мазкур совринни қўлга киритган илк футболчи бўлди. Бунгача у «Реал» билан (2016 ва 2017 йилда), шунингдек «Челси» сафида (2021) УЕФА Суперкубогида ғолиб бўлганди.

* Эрлинг Холанд «Манчестер Сити» таркибида 4-совринни қўлга киритиб улгурди. Кеча «Манчестер Сити» УЕФА Суперкубогида «Севилья»ни мағлубиятга учратиб, ғолиб бўлганди. Бу Эрлинг Холанд учун клуб таркибидаги 4-соврин бўлди. Бунгача норвегиялик футболчи «Сити» билан АПЛ, Англия кубоги ва ЕЧЛда ғолиб бўлди. Холанд 2022 йилнинг ёзида «Манчестер Сити»га келиб қўшилган. Бунгача у «Боруссия Д» ва «Ред Булл Зальцбург» билан учта соврин юта олган: 2018/19 йилги мавсумда Австрия чемпионати ва кубоги, шунингдек 2020/21 йилги мавсумда Германия кубоги.