ФИФАнинг навбатдаги қарорлари

1. ФИФА Тартиб-интизом қўмитасига Фаластин футбол ассоциацияси томонидан илгари сурилган камситиш айблови бўйича тергов очиш ваколати топширилди. Бошқарув, аудит ва мувофиқлик қўмитаси Фаластин ҳудудида жойлашган клубларнинг Исроил ички мусобақаларида иштирок этиши масаласида текширув ўтказиш ва тегишли хулоса бериш вазифасини юклади.

2. Клублар ўртасидаги ЖЧ-2025 регламенти тасдиқланди. Клублари мусобақада иштирок этаётган мамлакатлар футбол федерация­си истисно тариқасида, 1-10 июнь кунлари футболчиларни рўхатдан ўтказишга рухсат бериши мумкин. Шунинг баробарида қўшимча трансферлар ойнасини очиш қарори ҳар бир миллий федерация ихтиёридаги масаладир. Бундан ташқари, ЖЧда иштирок этувчи клублар турнир давомида (чекланган муддатда, 27 июнь - 3 июль) шартномалари тугайдиган футболчиларни алмаштириш имкониятига эга. Лекин бунинг учун муайян жамоа мамлакатида трансферлар ойнаси очиқ бўлиши шарт.

3. 2030 ва 2034 йилги жаҳон чемпионати мезбонини аниқлаш учун овоз бериш жараё­ни 11 декабрь куни, ФИФАнинг навбатдан ташқари Конгрессида бўлиб ўтади. Конгресс виртуал тизимда ташкиллаштирилади. Бунда даъвогар мамлакатлар техник баҳолаш бўйича минимал талабларни бажарган тақдирда сўровга қўйилади. Ҳар икки мундиал учун овоз бериш блокли. Яъни бир вақтнинг ўзида 2та турнир учун.

4. Бир қатор турнирлар муддати тасдиқланди:

* 20 ёшлилар ўртасидаги ЖЧ-2025: Чилида 27 сентябрь - 29 октябрь кунлари

* 17 ёшли қизлар ўртасидаги ЖЧ-2025: Марокашда 17 октябрь - 8 ноябрь кунлари

* Футзал бўйича аёллар ўртасидаги ЖЧ-2025: Филиппинда 21 ноябрь - 7 декабрь кунлари

5. ОФК учун 2025 йилнинг июнь ойида ФИФА кунлари белгиланди - 23 июнь - 5 июль.