Миллий терма ва футзалчиларимизга дахлдор хотиралар...

2007 йилнинг март ойида бўлган ўша охирги учрашув можаро билан тугаганди. Қирғизистонлик ҳамкасблардан бири мудом менга ўша Қирғиз матбуотида берилган мақола сарлавҳасини эслатади - «Қирғиз ҳакамини ғазабланган ўзбек футболчиларидан ОМОН қутқарди». Нега менга? Чунки ҳакам билан гаплашиш учун майдонга тушган Ўзбекистон терма жамоасининг ўша раҳбари мен эдим. Айтганча, мени ўша можаро ортидан моддий жазога тортишган. Ўзбекистон ва Қозоғистон термалари ўйинлари тарихи масаласида эслатиш керак, бу жамоалар Тошкентда охирги марта 1997 йилнинг 24 октябрида тўқнаш келган. Ўшанда жамоамиз шимолий қўшниларни 4:0 ҳисобида тор-мор келтирганди ва бу ЖЧ-98 саралаши ўйини эди. Айтганча, ўша учрашувдан ҳам бир неча воқелик бор, лекин улар ёзиш учун эмас.

***

- Футзал бўйича Осиё кубогида 3-ўрин учун кечган ўйин томошаси пайти дарвозада Рустам Умаровни кўриб, 2004 йили Макаода бўлиб ўтган қитъа чемпионати доирасидаги худди шундай учрашувни эсладим. Ўшанда 20 ёшли Умаров терма жамоадаги фаолиятини энди бошлаган ва асосий дарвозабон эмасди. Ўша турнир ўзим учун терма жамоа менежери ролидаги биринчиси эди. Макао-2004 узоқ ва шонли йўлнинг бошланиши бўлиб, унинг асосий ютуқлари - 2та ЖЧда иштирок ва Осиё кубогидаги 3та финал. Дарвоқе, терма жамоамиз 2004 йилги ўша ўйинда айнан Таиланд термасига 1:3 ҳисобида ютқазганди, шундан буён бу рақиб билан ўзаро тўқнашувларда бирор марта енгилмади.