Виталий Левченко: "Нефтчи"да малакали футболчилар етарли, аммо..."

Фарғонанинг «Нефтчи» клуби тожикистонлик мутахассис Виталий Левченкони бош мураббий этиб тайинлагач, клуб матбуот хизмати жамоанинг янги устози билан суҳбатлашди.

— Ўзбек футболи ва «Нефтчи» клуби ҳақида қандай тасаввурга эгасиз?  
— Ўзбекистонда футбол яхши ривожланмоқда. Барча жамоалар ўз имкониятига қараб яхши шаклланган. Шу боис, натижалар қандай бўлишини олдиндан айтиш қийин. Ўзбек футболчилари ўз мамлакатидагина эмас, балки Осиё давлатларида ҳам ўз имкониятларини намойиш этиб келмоқдалар. «Нефтчи» жамоасида малакали ўйинчилар етарли. Лекин, бунинг амалий натижаси сезилмаяпти. Мураббийлар штаби ана шу масалалар билан жиддий шуғулланиши керак. «Нефтчи» бой тарих ва анъаналарга эга. Биз ҳаммамиз ҳамкорликда ана шу анъана ва обрўни тиклашимиз лозим. Клуб тарихида ўзбек футболи афсоналаридан бири Юрий Вазгенович Саркисяннинг алоҳида ўрни бор. Мен уни жамоанинг Фарғонадаги учрашувларидан бирига таклиф этиб, қилган самарали меҳнатлари учун чин юракдан миннатдорчилик билдириб, яхшиликка-яхшилик билан эъзозлаш ташаббуси билан чиқмоқчиман. 

— Сиз келгунингизга қадар жамоа чемпионатнинг биринчи даврасини 13-ўринда якунлади. Ана шу оғир аҳволдан чиқиш йўли нимадан иборат деб ўйлайсиз?  
— Бизда иккинчи даврага тайёргарлик режаси мавжуд. Биз бу режаларни тўла амалга ошириш учун жиддий масъулият билан иш олиб боришимиз керак. 

— Жамоанинг миллий чемпионатдаги беллашувларига назар ташлаганмисиз?  
— Менда жамоамиз ҳақида айрим ахборотлар бор. Лекин, эндиликда нима иш билан шуғулланиш ва қайси позицияни кучайтириш лозимлиги ҳақида жиддий бош қотиришимиз зарур. 

— Айни пайтда клубда 3 нафар легионер бор. Жамоани кучайтириш учун уларни 5 нафарга етказиш керак. Сиз бу ҳақда ўйлаб кўрдизми?  
— Биз бу масалани чуқур ўйлаб ҳал қиламиз. Чунки, жамоани тубдан яхшилаш учун масъулиятни чуқур ҳис этадиган малакали футболчилар керак. 

— Ўзбек футбол клубларида фаоллик кўрсатиб, ўйнаётган йигитлар кўп. Улар орасида Акмал Холматов, Раҳматулла Фузайлов, Эҳсони Пайшанбелар бор. (А.Холматов, Р.Фузайлов фаолиятини якунлаган – Tribuna.uz). Сиз янги мураббий сифатида жамоага Тожикистон футболчиларидан таклиф этиш ниятингиз борми? 
 — Қўлида Тожикистон паспорти бўлган футболчини жамоага таклиф этишда ҳеч қандай мантиқ йуқ. Бизга олдимиздаги вазифани яхши тушунадиган ва майдонда масъулиятни чуқур ҳис этиб, ҳаракат қиладиган маҳоратли футболчилар керак. Улар маҳаллий шароитни ва миллий анъаналарни яхши билишлари ва доимо юксак марраларга интилишлари керак. 

— Мураббийлар штабини шакллантириш учун ўзингиз билан ишлаган ёки сиз яхши биладиган мутахассисларни таклиф этасизми?  
— Ҳа, дейишим мумкин. Бу борада жалб этилган мутахассислар талаб ва масъулиятни юракдан ҳис этиб, юксак марраларни эгаллаш учун бутун вужуди билан олдинга интилиши керак. Бизнинг ҳаракатимиз Швейцария соати каби аниқ ва бехато бўлиши керак. 

— Жамоа иккинчи давра учрашувларига тайёргарликни қачон бошлайди?  
— Белгиланган режа асосида 7 июль куни иш бошлаймиз. 

— Клуб мухлислари ҳақида қандай фикрдасиз? 
— Фарғона футбол ишқибозлари ўз жамоаларига меҳр ва садоқатларини азал-азалдан намойиш этиб келмоқдалар. Уларнинг жамоамизга ҳурмат ва эҳтироми «Нефтчи» юксак чўққиларига кўтарилган йилларда жуда баланд эди. Биз ўша эҳтиросларни қайтариш учун «Нефтчи»нинг азалий ғолибона юришларини тиклашимиз ва ўзбек футболида ўз ўрнимиз ва мавқеимизга эга бўлишимиз керак. Шунга интиламиз. 

— Яқинда ишга келган сербиялик мутахассис Милан Чирич ҳақида нима дея оласиз? 
— У янгиланган мураббийлар штабида биз билан бирга ишлайди, - дейди Виталий Левченко.

***
***
Унга мураббийлар штабида "Металлург", "Семурғ", "Рубин" жамоаларида фаолияти билан таниш Владимир Ежуров, Анвар Норқулов кўмаклашади. Дарвозабонлар мураббийи сифатида  "Истиқлол"да Виталий Левченко билан бирга ишлаган Фарруҳ Бердиев иш олиб боради. Футболчиларнинг жисмоний тайёргарлиги билан эса  Милан Чирич шуғулланишда давом этади.