ВоҚелик: Мислсиз «жон сақлаш»

Оддий айтганда, штутгартликлардан аввало, чемпионатнинг охирги турида «Кёльн»га қарши уй учрашувида 3 очко олиш талаб этиларди. Шунда ҳам уларнинг 15-поғонага кўтарилиш-кўтарилмасликлари «жон сақлаш» учун курашаётган «Герта»нинг қандай натижа қайд этишига боғлиқ бўларди. Чунончи, Берлин клуби тур олдидан «Штутгарт»ни 3 очкога ортда қолдираётганди. Қарангки, икки талаб ҳам амалга ошди. Яна сеҳрли даражада.

Дортмундда «Боруссия» меҳмони бўлган «Герта» ўз вазифасини «бажариб», 1:2 ҳисобидаги мағлубиятни тан олди. Ваҳоланки, ўйин­да ҳисобни берлинликлар очишди ва 84-дақиқагача ўзлари учун мақбул натижа (1:1)ни сақлаб туришди. Кейин хайрлашув оқшомидан қувватланган «Боруссия» олдида «бош эгишди», барибир. «Штутгарт»нинг ўзи эса еврокубоклар йўлланмасидан умидвор «Кёльн» билан баҳсда чинакамига қийналди ва 90}2-дақиқадагина ғалаба голини нишонлади - 2:1. Бу вазиятда ҳаттоки, «Штутгарт» дарвозабони ҳам рақиб жарима майдонига келганди.

«Штутгарт»нинг Бундеслигада қолишини таъминлаган гол ва финал ҳуштагидан кейин «Мерседес-Бенц-Арена»да нималар бўлганини ўзингиз тасаввур қилиб олаверинг. Байрамни ҳеч ким тўхтатолмасди. Мухлислар ҳаттоки, дарвозани майдалашгача боришди. Ақлга сиғмас «жон сақлаш»га яраша ақлга сиғмас байрам...