Бир ўйлаб қарасак, Суперлига-2025 якунига бағишган туркум статистик мақолаларда автогол мавзуси эътибордан четда қолибди. Бугун «Ҳечдан кўра, кеч яхши» мақолига амал қилган ҳолда, шу кемтикни тўлдиришга қарор қилдик. Демак, ўтган мавсум автоголлари «ИФ» нигоҳида.

Ҳисоб бўйича XXXIV миллий чемпионатимиз юқори лигасидан ўрин олган 240та ўйинда жами 18та автогол қайд этилди. «Машъал» ва «Сўғдиёна» футболчилари ўз дарвозаларига ҳаммадан кўп тўп киритиб қўйишди – 4тадан автогол. «Андижон» футболчилари эса чемпионат давомида автоголнинг оғир қисматига 3 марта юз тутишди. «Навбаҳор»­да авто қўшимчасига эга гол 2та, эътиборлиси, «лочинлар» бунга 1та ўйин («Андижон»га қарши)да дуч келишди. Шунингдек, «Нефтчи», «Хоразм», «Бухоро», ОКМК ва «Қўқон-1912» жамоалари чемпионат давомида 1тадан автогол жабрини тортди.

Шахсий кўрсаткичларга келсак, Эргаш Исмоилов («Машъал») ва Отабек Аҳадов («Сўғ­диёна») 2тадан автогол билан ажралиб туришди. Эътиборлиси, ўтган мавсумдаги 18та автоголдан 6таси легионерлар ҳисобига ёзилди. Бу эса бутун чемпио­натимиз тарихидаги антирекорд­дир. Эслатма, Ўзбекистон чемпионати юқори лигасидаги биринчи автогол 1992 йилнинг 20 апрель куни, яъни дебоча мавсумнинг 6-турида қайд этилганди. Ўшанда Самарқанднинг «Мароқанд» (ҳозирги «Динамо») клуби ҳимоячиси Сергей Сергеев автоголлар ҳисобини очиб берган. Шундан буён элит лигамизда қайд этилган автоголлар сони 321тага етди. Бу катта статистик тўплам, албатта ва барча автоголлар муаллифларини келтириш кўп жой олади. Шунинг учун алоҳида ихчам жадвал туздик. Унда 1992-2025 йиллар ўз жамоаси дарвозасига энг гол урган футболчилар кўрсатилган. Аниқроқ айтсак, рўйхатга 2та ёки кўпроқ автогол муаллифига айланган футболчилар киритилган. Ўтган мавсум якунига кўра, Эргаш Исмоилов ва Отабек Аҳадов ушбу ўзига хос қисматдош футболчилар клубидан дебютант сифатида жой олишди. Дарвоқе, автоголлар жадвали миллий чемпионатмиз тарихида илк бор тузилган статистик ҳисобот варақасидир.

СУПЕРЛИГА|ОЛИЙ ЛИГАДА ЭНГ КЎП АВТОГОЛ ҚАЙД ЭТГАН ФУТБОЛЧИЛАР (1992-2025 ЙИЛЛАР)

1. Сарвар Шарипов («Сўғдиёна», «Динамо», «Шўртан») – 5та

2. Дарко Станоевич («Навбаҳор», ОКМК, «Сурхон») – 4та

3. Шерзод Аъзамов («Насаф», «Пахтакор») – 3та

4. Игорь Голбан («Насаф», «Навбаҳор») – 3та

5. Асхат Жалолов («Кимёгар», «Гулистон») – 3та

6. Георги Квесиешвили («Қизилқум») – 3та

7. Сардор Мирзаев («Нефтчи», «Локомотив») – 3та

8. Авaзбек Ўлмасалиев («Бунёдкор», ОКМК) – 3та

9. Асрор Ғофуров («Сурхон») – 3та

10. Афзал Азизов («Андижон») – 2та

11. Денис Азизов («УзДонгЖу») – 2та

12. Ҳаким Аламхонов («Динамо») – 2та

13. Станислав Андреев («Пахтакор», «Сўғдиёна») – 2та

14. Ильдар Ахтямов («Сурхон») – 2та

15. Отабек Аҳадов («Сўғдиёна») – 2та

16. Шавкат Аҳмаджонов («Тўполанг») – 2та

17. Омар Бердиев (ОКМК) – 2та

18. Эргаш Исмоилов («Машъал») – 2та

19. Ғиёс Комилов («Навбаҳор», «Қўқон-1912») – 2та

20. Ильдар Маматказин («Динамо», «Андижон») – 2та

21. Салим Мустафоев («Локомотив», «Қизилқум») – 2та

22. Ойбек Нурбоев («Бухоро») – 2та

23. Акмал Рустамов («Қизилқум») – 2та

24. Масъуд Тоиров («Нефтчи») – 2та

25. Ислом Тўхтахўжаев («Нефтчи», ОКМК) – 2та

26. Саламат Қутибоев («Машъал», «Бухоро») – 2та

Сергей КНЯЗЕВ