Украина чемпионати Биринчи лигаси иштирокчиси «Чернигов» антифутболга йўғрилган ўйин услубини ифодаловчи «харамбол» терминига жуда мос тушмоқда. Биринчидан, камтарин жамоа мамлакат кубоги финалига чиқиб, тарихий натижа қайд этди. Иккинчидан, турнирда курашни 1|32 финалидан бошлаган клуб ҳал қилувчи ўйингача бўлган йўлни атиги 2та гол билан босиб ўтди.

5та ўйинда 2та гол ва финал! Ажабо, шунақаси ҳам бўлар экан-да. Гап шундаки, «Чернигов» 3та босқичда рақибларидан пенальтилар серияси бўйича устун келди. Жумладан, ярим финалда «Металлист 1925» билан тўқнаш келган жамоа 4-дақиқадаёқ қизил карточка туфайли майдонда озчилик бўлиб қолди. Шунга қарамай, «Чернигов» 0:0 ҳисобини сақлаб қолди ва пенальтилар сериясида финал чиптасини юлиб олди – 6:5.

Ваҳоланки, «Чернигов» футболчилари бутун 120 дақиқа давомида «Металлист» дарвозаси томон лоақал бир марта зарба йўлламашди, фақат ҳимоя билан шуғулланишди. Ўйин статистикасига қарасак, зарбалар (31:0), аниқ зарбалар (13:0), хавфли вазиятлар (15:0), қўйингки, барча жиҳатлар бўйича «Металлист» устун, аммо финал чиптаси «Чернигов»да! Қойилмисиз? Дарвоқе, «харамбол»нинг янги қироли энди 20 май куни финалда Киев «Динамо»си асабини синовдан ўтказади.

«Чернигов» Украина кубогида

1|32 финал: «Атлет» – «Чернигов» – 0:1

1|16 финал: «Чернигов» – «Кривбасс» – +:- (техник натижа – 3:0)

1|8 финал: «Чернигов» – «Лесное» – 1:1 (пен. – 4:3)

1|4 финал: «Чернигов» – «Мариуполь» – 0:0 (пен. – 5:4)

1|2 финал: «Металлист 1925» – «Чернигов» – 0:0 (пен. – 5:6)

Финал: «Динамо» К. – «Чернигов» (20 май)