Чиро Феррара: "Менга Тиаго Мотта ёқади, аммо..."

Тадбирни ёритиш учун ташриф буюрган Jufc.ru сайти ижодкорлари фурсатдан фойдаланиб, неаполлик хушчақчақ йигит билан суҳбат уюштиришга эришишди. Италиядан узоқда ичилган бир пиёла кофедек тетиклантирувчи кайфият инъом этган дўстона мулоқотда асосан «Ювентус»нинг муаммолари муҳокама қилинди.

- Хайрли тонг, Чиро! Келинг, бироз ортга қайтайлик ва Италия Суперкубоги ярим финалидаги «Ювентус» - «Милан» учрашувини ёдга олайлик. Сизнингча, «Юве» мағлубиятга лойиқмиди?

- Баъзида натижа ўйин суратини акс эттирмайди ва айнан шу нарса футболни янада жозибалироқ кўрсатади. Холис айтганда, «Ювентус» «Милан»га қарши бутун ўйин давомида ташаббусга эга бўлди, бироқ «россонерилар» ўйинни ушлаб туриш ва курашда қолиш учун етарли кучга эга эди. Якунда уларда баҳсни ўз томонларига оғдириш имконияти пайдо бўлди ва бундан унумли фойдаланишди. Менимча, «Юве»нинг мағлубияти учрашувда йўл қўйилган хатолар билан боғлиқ бўлди.

- Бизнингча, «Ювентус»да характер етишмаётгандек...

- Аслида, бу йил жамоа оғир мавсумни ўтказмоқда. Эҳтимол, раҳбарият ва мухлислар вазият бошқача бўлади, деб умид қилишгандир. Аммо, ўз тажрибамдан келиб чиқиб айтишим мумкинки, «Ювентус» каби катта жамоаларда сов­ринлар учун курашдан эрта маҳрум бўлиш оддий қабул қилиб бўлмайдиган жараён.

- Сизнингча, қишки трансфер бозоридаги фаоллик «Ювентус»га вазиятни ўзгартириш учун ёрдам берадими?

- Аниқ бир гап айтолмайман. Одатда қишки трансфер бозорида жамоа ўйинини муайян маънода ўзгартира оладиган ижрочиларни қўлга киритиш қийин. Йилнинг бу фаслида «А» Серия ва умуман Италия футболи бўйича маълум тасаввурга эга футболчилар эмас, балки бу чемпионатда етарли тажриба орттирганларгина ўзларини кўрсата олишади. Аммо ўйлашимча, «Интер»­дан ташқари барча клублар таркибда ўзгартиришларга қўл уришади, барибир.

- Жорий мавсум «Ювентус» қайд этган 11та дурангни тасодиф билан изоҳлаб бўлмайди. Ёки сизда қандайдир тушунча борми?

- Футболда шунақаси ҳам бўлиб туради. Ўтмишда ҳам «Ювентус» билан қийин дамларни бошдан кечирганмиз. Аммо, жамоа «А» Серияда Чемпионлар Лигасига йўланма берувчи якуний зона чегарасида юрган эмас. Шунинг­дек, «Юве» скудеттони қўлга кирита олмаслиги мумкин, аммо бунга интилиши керак.

- Нима деб ўйлайсиз, ҳозирги «Ювентус»да чемпионлик амбицияларига эга бўлган сифатли таркиб борми?

- Менимча, ҳа. Балки дурангларнинг кўплиги туфайли жамоа кучли учликдан орқада қолгандир. Умид қиламанки, «Ювентус» ўз мавқеига яраша ўринлар учун кураша олади.

- Влаховичнинг жамоада тутган ўрнини қандай баҳолайсиз?

- Голлар сони бўйича ҳаммаси жойида ва у доимо икки хонали рақамларни қайд этади. Агар Влаховичнинг ўйинига баҳо берадиган бўлсак, у тўп билан ишлаш, жамоа билан мулоқот қилишни яхшилаши керак. Клуб марказий ҳужумчидан нимани хоҳлаётганини тушуниб олса ҳаммаси изига тушиб кетади.

- «Интер» «Ювентус» сингари кетма-кет 9 марта чемпион бўла оладими?

- «Наполи» ва «Интер» ғалаба қозонган сўнгги икки мавсумда чемпионатда фақатгина битта рақобатчи бор эди. Бу мавсумда бош сов­рин учун курашаётган жамоа­лар сони кўпайганининг гувоҳи бўляпмиз. Эндиликда «Интер» нафақат майдонда, балки корпоратив миқёсда ҳам бошқаларга қараганда анча шаклланган жамоага эга ва бу унинг муваффақиятларини кафолатлай олади. Аммо кетма-кет 9та чемпионликни қўлга киритган жамоани яна кўришнинг иложи йўқ.

- Жамоани ким яна аввалги савияга кўтариши керак: клубми, мураббийми, сардорми, мухлисларми ёки бошқаси?

- Жамоа ичида нималар рўй бераётганини билмайман. Буни муҳокама қилмоқчи ҳам эмасман. Клубда етакчилар кўп ва улар масъулиятни зиммаларига олишлари керак. «Юве»да катта ғалабаларни кўрган тажрибали футболчилар тўп суришади. Хуллас, Туринга келган янги ўйинчилар у ерда қандай машғулотлар ўтказилишини ва топ футболчилардаги ўзига хос руҳий кучни дарҳол англаб етиши лозим. Бу ниҳоятда муҳим жараён.

- Шахсан сизга Тиаго Моттанинг футболи ёқадими?

- Менга унинг «Болонья»да қўллаган услуби жуда ёқарди. Бироқ «Юве»даги муаммо фақатгина Мотта билан боғлиқ эмас. Муаммо ғалаба қозониш интстинктини яхши ўзлаштирган Аллегрини ишдан бўшатишганида. Унинг жамоада тутган ўрни қай даражада эканлигини кимдир гапириши шарт эмас. Шунчаки, натижаларга қараш керак, тамом - вассалом. «Юве»дан чиройли ўйинни хоҳлаганлар Аллегрини ишдан бўшатиб юборишди, бу эса катта хато бўлди. Масалан, Консейсао «Милан»га келганида чиройли футбол ҳақида умуман қайғурмаслигини айтди. У рақибидан 1та гол кўп уришдан кўра, иложи бўлса умуман гол ўтказиб юбормасликни афзал кўради. Ҳа, бу мутахассис дарҳол ўзи хоҳлаган йўлни белгилаб олди. Аксинча, Тиаго Моттада тўртта муаммо бор. Биринчиси - Чемпионлар лигасига йўл олиш, иккинчиси - Скудетто учун курашишга ҳаракат қилиш, учинчиси - Туринга камида битта унвон олиб келиши керак. Ва охирида, жамоа яхши футбол кўрсатиши керак.

Хуршид ЮСУПОВ тайёрлади