Ўзбекистон миллий терма жамоаси бош мураббийи Темур Кападзе ва футболчимиз Азизбек Турғунбоев Ўмонга қарши учрашув олдидан матбуот анжуманида иштирок этди.
Темур Кападзе (Ўзбекистон МТЖ бош мураббийи): — Мусобақага тайёргарлик яхши кетмоқда, барча футболчилар оптимал ҳолатда. Легионерларимиз аста-секин йиғинга қўшилмоқда. Бу турнир биз учун фойдали бўлади, бор эътиборимизни мусобақага қаратганмиз. Ватан жамоаси битта – унга ҳаммамиз мухлислик қиламиз. Мундиалга оз вақт қолди, муносиб тайёргарлик кўришимиз керак. Сўнгги йилларда футболимиз ривожи учун барча шароитлар яратилмоқда, ислоҳотлар давом этмоқда. Машарипов ва Ашурматов биз учун жиддий йўқотиш. Баъзи футболчилар клубларида ўйин ўтказиб кейинроқ йиғинга қўшиляпти, тактик ва жисмоний тайёргарлик учун вақт кам, лекин бу табиий жараён. Бироқ бу ҳолат бошқа футболчиларга ўзини кўрсатиш учун имконият яратади.
Ҳар бир рақиб жамоага янги мураббий тайинлангач, уларга қарши ўйнаш қийин бўлади. Ўмоннинг сўнгги ўйинларини кузатдик – ҳозир улар бошқа услубда ҳаракат қилишмоқда. Кейруш тажрибали мутахассис, янги жамоа шакллантирмоқда. Нима юз беришини эртанги ўйинда кўрамиз. Биз эса ўз режаларимиз асосида турли услубларни синаб кўрамиз ва зарур натижани қўлга киритишга ҳаракат қиламиз.
Азизбек Турғунбоев (Ўзбекистон МТЖ ярим ҳимоячиси): — Яхши кайфиятда йиғинга келдик, машғулотлар ҳам, тайёргарлик жараёни ҳам самарали ўтмоқда. Олдимизда муҳим ўйинлар турибди. Мухлисларни стадионга таклиф қиламиз. CАFА мусобақаси ҳақиқий футбол байрами бўлади. Жамоамизни қўллаб-қувватлаш учун мухлисларимизни эртанги ўйинда биз билан бирга бўлишга чақирамиз.
