АНА, ХОЛОС! Яна бир айблов - қиморбозлик...

Корейслар турнир ярим финалида Иордания термасига ютқазишганидан кўп ўтмай, жамоада соғлом муҳит бузилгани, жумладан, «ПСЖ» вакили Ли Кан Ин чин етакчи ва сардор Сон Хюн Минга қўл кўтаргани овоза бўлганди. Энди эса Ж.Корея терма жамоасининг тартибсевар футболчилари ва ходимлари Осиё кубоги пайти қиморбозликка берилишгани ошкор қилинди. Наҳотки, германиялик мутахассис жамоани шу қадар бўш қўйиб юборган бўлса...

YNA манбасида келтирилишича, Осиё кубоги давом этаётган пайт Жанубий Корея миллий жамоаси лагерида чиндам ҳам, қиморбозлик авж олган. Яъни бир қатор футболчилар ва ходимлар қарта ўйинида бир-бирларидан турли миқдорда пул ютиб олишган. Жанубий Корея футбол ассоциацияси томонидан олиб борилган текширув натижасида аниқланишича, футболчилар ва ходимлар меҳмонхона залида ҳар бир қарта ўйини учун 1000-5000 вона (1-4 доллар) тикишган. 

Ассоциация расмий вакилининг қўшимча қилишича, ҳар бир ўйинда энг кўп ютқазган футболчилар чамаси 40-50 минг вона (30-38 доллар) йўқотишган. Тўғри, ассоциация сумма пастлигидан келиб чиқиб, бундай ўйинларни «тоза қимор» ўрнида қабул қилмади. Шунга қарамай, қарта ўйинида қатнашган терма жамоа ходими ишдан бўшатилди. Қайд этилишича, бундай «эрмак қимор»да асосан 28 ёшдан кичик футболчилар иштирок этишган. 

Ж.Корея футбол ассоциацияси Осиё кубоги вақтида терма жамоа либосларини сотган ходим иши юзасидан ҳам тергов ўтказмоқда. Маълум бўлишича, турнир давомида терма жамоанинг биринчи рақамли, яъни асосий формаси ноқонуний тарзда сотилган. Оқибатда корейслар футболка етишмаслиги туфайли Иордания термасига қарши кечган ярим финал баҳсида захира либосларида майдонга тушишган. Ваҳоланки, Ж.Корея термаси ўша баҳсда норасмий мезбон сифатида асосий формадан фойдаланиш ҳуқуқига эга эди.