Бутун Эрон Роналду билан овора бўлди-я...

«Ал-Наср» клуби «Персеполис»га қарши ўйиндан бир кун олдин Теҳронга етиб келди. Аэропортга мислсиз даражада кўп мухлис йиғилди. Албатта, Криштиану Роналду билан кўришиш ниятида.

Аввалига «Персеполис» номидан португалиялик юлдузга Эрон гиламини совға сифатида беришди. Ушбу гилам қўл меҳнати самараси бўлиб, бутун дунёда машҳур. Чиройли ижод наманаси! «Ал-Наср» делегацияси жойлашган автобус ҳам оломон ичида қолди ва белгиланган меҳмонхонага зўрға етиб олди. Отель атрофида ҳам шу ҳолат: бино атрофида тўпланган мухлислар Криштиануни тинмай олқишлашди: «Роналду, Роналду!» Одамлар Кришни кўриш учун ҳаттоки анча қия тепаликлар устига ҳам чиқиб олишди. 

«Перспеполис» президенти Ризо Дарвиш эса Криштиануга (умуман, рақибнинг барча футболчиларига) чекловсиз интернет пакетини ўз ичига олган сим-карта бериш ташаббуси билан чиқди. Ваҳоланки, Эронда интернетдан фойдаланишда жиддий чекловлар бор. Дейлик, энг йирик мессенжер ва 10 минг­лаб сайтлар «қулф­ланган». Хусусан, «Инстаграм» тармоғи ҳам.

Криштиану Роналдунинг ўзи ҳам катта қалб соҳиби эканлигини амалда кўрсатиб, қўшимча очколар ишлади. Яъни эронлик ёш мухлисни ўз хонасига таклиф этди. Гап шундаки, Криш билан кўришишни истаган болакай меҳмонхона олдида қўриқчилар томонидан тўхтатиб қўйилганди. Бундан хабар топган португалиялик уни ўз хонасида қабул қилди. Табиийки, болакай энди мегаюлдуз билан учрашувни бир умр унутмайди.