Ҳеч бири енгилмас эмас

Янги йилнинг биринчи оқшоми Лига 1нинг дастлабки 16та ўйинида мағлубиятни тан олмаган «ПСЖ» меҳмонда «Ланс» олдида тўхтаганди. Шундан 3 кун ўтиб, «Наполи» Милан сафаридан қуруқ қайтди - «Интер» 1:0 ҳисобида устун келиб, Лучано Спаллетти жамоасининг «А» серияда 15та турга чўзилган мағлубиятсиз одимини узди-қўйди.

Неаполь жамоаси бунга қадар 15та ўйиндан 13тасини ўз фойдасига ҳал қилиб, 2 марта дуранг натижага рози бўлганди. Диққат қилинг, Спаллетти шогирдлари ЖЧ-2022 стартига қадар 15та ўйинда 37та гол уриб, 12та қўйиб юборишганди. Қолаверса, «Наполи» бу юриши давомида 4та ўйинни йирик ҳисобли ғалаба билан тугатди, яна 3тасида рақиблар дарвозасини 3 мартадан нишонга олди. Яна бир томони, неаполликлар мағлубиятсиз серия ичига кирган 15та ўйиндан атиги биттасида гол уришмаганди (фақат унда 0:0 ҳисобини сақлаб қолишган). «Интер» эса «Наполи»га гол уриш имкониятини бермаслик баробарида ўзи рақиб дарвозасига йўл топди. 

Ҳа, футболда енгилмас жамоанинг ўзи йўқ. Буни «Наполи» мисолида ҳам кўриш мумкин. Ҳаттоки, баъзи рақиблар ҳам бу кетишда скудетто Неаполь дружинаси мулкига айланишини тан ола бошлагандилар. Лекин амалда кураш ҳали давом этадиган кўринади.