ФУТБОЛ ВА МОЛИЯ: Саводхон савдогар

Монегасклар мунтазам равишда ўта манфаатли трансферларни амалга ошириб келадилар. Улар орасида рекорд мақомидаги келишувлар ҳам йўқ эмас. Навбатдаги материалимиз князлик клубининг манфаатли келишувлари ҳақида.

Бернарду СИЛВА

Қайси жамоага сотилган: «Манчестер Сити»га

Қандай баҳода: 50 млн. евро

Силва «Монако»да 3 йил тўп сурди. Аввалига монегасклар «Бенфика» хавбекини ижарага олдилар, кейин мавсумнинг қоқ ярмида 15,75 млн. еврога харид қилдилар. 2017 йилнинг июлида «Монако» португалиялик футболчини 50 млн.га «Ман.Сити»га сотиб юборди. Хосеп Гвардиоланинг эътибори туфайли «Иттиҳод»га йўл олган футболчи 5 йилдан бери самарали тўп сурмоқда. Князлик клубига эса, Бернарду мўмай даромаддан ташқари, 147та сермазмун ўйинлари билан манфаат келтирди.

Бенжамен МЕНДИ

Қайси жамоага сотилган: «Манчестер Сити»га

Қандай баҳода: 57,5 млн. евро

Силванинг ортидан Менди ҳам Манчестерга равона бўлди. Фарқи, «шаҳарликлар» франциялик футболчига нисбатан кўпроқ маблағ сарфладилар. Ваҳоланки, князлик клуби уни 2016 йил ёзида 13 млн. еврога харид қилганди. Гвардиола бу гал трансферда омадсизликка учради. Бенжамен унинг жамоасига фойдадан кўра кўпроқ муаммолар келтирди. Қонунга оид камчиликлари туфайли франциялик футболчи 1 йилдан бери майдонга туша олмаяпти. Шу кетишда унинг келажаги порлоқ ҳимоячи мақомига путур етиши ҳеч гап эмас.

Антони МАРСЬЯЛЬ

Қайси жамоага сотилган: «МЮ»га

Қандай баҳода: 60 млн. евро

Марьсяль трансфери - «Монако» учун ўта муваффақиятли келишув. 2013 йил ёзида «Лион» ёшлар жамоаси аъзосини атиги 5 млн.га харид қилиб, 2 йилдан кейин 12 баравар қимматроққа пулладилар. Аслида, франциялик ҳужумчи князлик клубида бирон-бир юмушни дўндира олмаганди. «Олд Траффорд»даги 8 йиллик фаолиятида ҳам «қизил иблислар»нинг тўпурар ҳужумчиси мақомига кўтарила олмади. Эрик тен Хаг билан ҳамкорлик - Марьсяль учун сўнгги имконият. Ундан унумли фойдалана олмаса, Манчестерни тарк этишга мажбур бўлади. манкунианлар ҳозирнинг ўзида унинг ўрнига муносиб номзод топишга уринмоқдалар.

Тома ЛЕМАР 

Қайси жамоага сотилган: «Атлетико»га

Қандай баҳода:72 млн. евро

«Монако»нинг аввалгисидан ҳам омадлироқ олди-сотдиси. 2015 йилда Лемар 4 млн. евро эвазига «Кан»дан монегасклар сафига ўтганди. 3 йилдан кейин князликларга нақ 72 млн. евро даромад келтирди. Тома сўнгги мавсумни рисоладагидек ўтказиб, 4та гол ва 5та самарали узатмани амалга оширган бўлсада, унгача ўйин амалиёти ва сермаҳсуллик борасида муаммоларга дуч келганди. Лекин барибир, у «Монако»да намойиш этган юксак савиядан анча йироқ. Шунга қарамасдан, «матрасчилар» Лемар билан амалдаги шартнома муддатини узайтириш ниятидалар.

Хамес РОДРИГЕС

Қайси жамоага сотилган: «Реал»га

Қандай баҳода: 75 млн. евро

2013 йил ёзида «Порту»дан 45 млн. еврога харид қилинган Родригес князлик клубида бор-йўғи 1 мавсум тўп сурди ва Мадридга отланди. «Қироллик клуби»даги дебютини кўтаринки кайфиятда (13та гол ва 13та ассист) бошлаган колумбиялик хавбек кейин негадир сустлашиб қолди. Жамоа Зидан тасарруфига ўтгач, Хамес учун омадсизлик даври бошланди. Ҳозир у қатарнинг «Ал-Райян» жамоасида ўйнамоқда, лекин Европага қайтиш истагини тез-тез такрорлаб туради.

Орельен ТЧУАМЕНИ

Қайси жамоага сотилган: «Реал»га

Қандай баҳода: 80 млн. евро

Тчуамени трансфери «Монако»нинг охирги келишувларидан бири. «Бордо» хавбекини улар 2020 йил январида 18 «лимон» эвазига ўз сафларига қўшиб олгандилар. Жорий йил июнида уни 80 млн.га харид қилган «қироллик клуби» яна 20 млн. бонусга ҳам ваъда берди. Умуман, мадридликлар келажак учун улкан ҳаражатларни амалга оширдилар. Мазкур келишув ўзини оқлаши лозим. Тчуамени - барча фазилатларга эга бўлган таянч ярим ҳимоячиси, Карло Анчелотти эса, ўз шогирдлари салоҳиятини юзага чиқаришни яхши билади.

Килиан МБАППЕ

Қайси жамоага сотилган: «ПСЖ»га

Қандай баҳода: 180 млн. евро

Франциялик ноёб иқтидор соҳиби - «Монако» тарихидаги рекорд трансфер сабабчиси. Килиан ўсмирлик давридаёқ князликлар академиясидан жой олганди. 4 йиллик фаолиятдан сўнг, у пойтахтга аввал ижара асосида, кейин чинакам шартномага кўра тўп сура бошлади. Мазкур келишув князликлар учун энг қиммат, парижликлар учун эса 2-ўриндаги (222 млн.ли Неймардан кейин) трансфердир.

МУҲАММАДСОДИҚ тайёрлади.