ФУТБОЛЧИ ВА ОИЛА: Чавандоз ўрнига гандболчи

Аниқроқ айтсак, «Бавария» клуби ва Германия миллий жамоаси дарвозабони янги маҳбубаси билан муносабатларини ниҳоят расмийлаштирди. Умуман, жорий йилнинг куз фасли Мануэль учун қувонч-­ли воқеалар тақдим этди. Биринчидан, кипер узоқ танаффусдан кейин яшил майдонга қайтди. У ўтган йилнинг декабрь ойида, жаҳон чемпионатидан сўнг чанғида учиш чоғи жиддий жароҳат (болдир суяги синганди)га йўлиққанидан буён даволаш курсларига қатнаётганди. Ниҳоят, 28 октябрь куни Бундеслига ўйинида қайта кўриниш бера бошлади. Иккинчидан, Мануэль 23 ёшли маҳбубаси Аника Биссель билан расман никоҳдан ўтди.

Германиялик дарвозабоннинг кўплаб шахсий мухлислари Аника ташқи кўриниши билан Мануэлнинг олдинги рафиқаси Нина Вайссга жуда ўхшаш эканлигини таъкидлашмоқда. Айтиш керак, Вайс хоним меҳмонхона бизнеси билан шуғулланувчи бадавлат хонадоннинг қизи ва етарлича муваффақиятга эришган чавандоз ҳисобланади. Дейлик, у от спорти бўйича Германия миқёсидаги бир қатор йирик турнирларда ғолиб чиққан. Яна бир томони, Нина ва Аника ҳамда 2009-2014 йиллар оралиғида Мануэлнинг севгилиси сифатида танилган соч турмаклари устаси Кэтрин Гильх ўртасида сезиларли даражада фарқ бор. Умуман олганда, Нойернинг биринчи расмий никоҳи 3 йил давом этди. Айтишларича, Нина спортдаги фаолиятини давом эттиришни хоҳлаган, бироқ Мануэль бунга қарши чиққан. Чунки у серфарзанд оилани орзу қиларди. Қисқаси, бу масаладаги келишмовчиликлар охир-оқибат, оиланинг пароканда бўлишига олиб келди ва жуфт­лик 2020 йилнинг бошида расман ажрашди.

Мануэль Нойер шундан атиги бир неча ой ўтгач, 19 ёшли гандболчи Аника Биссель билан учрашди. Ёш бўйича ўртадаги 14 йиллик фарқ ҳам янги ишқий муносабатлар ривожланишига тўсқинлик қилгани йўқ. Ҳар ҳолда, Аника «Бавария» ўйинларини тез-тез стадионда кузатишга одатланди. У трибунада Мануэлни фаол қўллаб-қувватлаши билан ҳам ажралиб турди. Аника жумладан, Нойер ортидан Қатар мезбонлик қилган ЖЧ-2022га ҳам борди ва Германия миллий жамоаси ўйинларини бевосита Доха стадионларида кузатди. 

Мануэлнинг мундиалдан кейин жароҳат туфайли сафдан чиққани унга янги маҳбубусига кўпроқ вақт ажратиш имконини берди. Иккиси сентябрь ойига келиб, «Бавария»нинг кўплаб футболчилари иштирок этган анъанавий Мюнхен пиво фестивалига бирга ташриф буюрди. Мануэль ва Аника айнан Октобер­фестда ўзаро оилавий ришталарни боғлашларини эълон қилишди. Нойер шунинг баробарида ота бўлиш орзуси яқин орада амалга ошишини ҳам тилга олди. Шу тариқа янги жуфтлик ноябрь ойи бошида тўй маросимини ўтказди. Унда ҳар иккисининг қариндошлари қатнашишди, холос. Яъни тўй тантаналари тор доирада ташкиллаштирилди. Дарвоқе, янги оила аллақачон фарзанд кутмоқда. Чақалоқ эрта баҳорда туғилади ҳисоб-китобларга кўра.