Легионерларимиз: Дебютда 0:0

 Ўзбекистон U-20 термаси сардори Умарали Раҳмоналиев мазкур баҳсда Россия чемпионатида дебют қилди. Бошланғич таркибдан жой олган ҳамюртимиз майдонда тўлиқ вақт фаол тўп сурди. Раҳмоналиевнинг клубдоши Рустам Ашурматов ва «Алания» ҳужумчиси Ҳусайн Норчаев эса ўйин вақти тегишлича Ўзбекистон миллий ва олимпия терма жамоалари йиғинида эдилар.

Айтиш жоиз, U-20 тоифасидаги Осиё чемпионати якунланиши билан «Рубин» ихтиёрига қайтган 19 ёшли Умарали Раҳмоналиевни клубда жуда илиқ қарши олишди. Жумладан, жамоа бош мураббийи Юрий Уткульбаев ва футболчилар машғулотлар бошланишидан олдин ҳамюртимизни чемпионлик билан қутлашди. Шунингдек, «Рубин» матбуот хизмати Ўзбекистон ёшлар термаси сардоридан Осиё чемпионати юзасидан қисқача интервью олди. 

- Умарали, Осиё кубогидаги ғалаба қандай ҳис-туйғулар бағишлади?

- Аввало, барчани Рамазон ойи бошланиши билан табриклайман! Осиё чемпионатидаги ғалаба чексиз қувонч бағишлади, албатта. Бу йил ўз олдимдаги вазифалардан бирини бажардим, энди яна бир муҳими қолмоқда - «Рубин» билан РПЛга қайтиш. Демак, олдинда ишлар кўп.

- Клубга қандай кайфият билан қайтдингиз?

- Ажойиб! Осиё чемпиони бўлгач, кубокни шахсан Президент қўлидан олдим ва уни бирга кўтардик - бу катта шараф.

- Шиддатли турнирдан ке­йин чарчоқ йўқми?

- Йўқ, аксинча, кучга тўла қайтдим. Ҳа, кўп энергия ва эмоция сарфладик. Энди барчасини тезроқ жамлаб, «Рубин» ўйинларига тайёргарлик кўришим керак.

- «Алания»га қарши ўйинда жамоага ёрдам беришга тайёрмисиз?

- Албатта. Биринчи расмий ўйинни интиқ ҳолда кутяпман ва имкон берилса, хурсанд бўлардим. Аммо лигада ҳар бир ўйин мураккаб ва «Алания» билан баҳс ҳам осон кечмаслиги тайин.