Ўйин ҳақида
Миржалол Қосимов: Авваламбор барчага Ассалому алайкум! Эртага бизни жудаям қизиқарли ўйин кутмоқда. Иккала жамоада ҳам гуруҳ босқич йўлланмасини қўлга киритиш имконияти бор. Бу ерга яхши ниятда келганмиз. Мақсадимиз гуруҳ босқичига чиқиш.
Санжар Турсуновга савол. Эртанги баҳс учун жамоа қандай тайёргарлик кўрди? Бўлажак ўйин ҳақида фикрингиз?
Ассалому алайкум! Биз барчасини тушуниб турибмиз, бу ўйин жуда муҳим баҳс ҳисобланади. Ғолиб эса гуруҳ йўлланмасини қўлга киритади. Барча футболчилар номидан айтишим мумкин, биз эртанги ўйинга тайёрмиз.
«Ал Араби» клуби ҳақида қандай маълумотларга эгасиз ва эртанги ўйиндан нималарни кутмоқдасиз?
Миржалол Қосимов: «Ал Араби» шаклланган жамоа ҳисобланади. Таркибда кучли легионерлар ҳаракат қилади. Қолаверса, тўп билан муомалада жамоавий ўйин намойиш этиб кўпроқ ҳужумга эътибор қаратади.
Таркибда дисквалификация сабаб Мартин Боакенинг йўқлиги жамоа ўйинига қандай таъсир кўрсатади?
Миржалол Қосимов: Футбол жамоавий ўйин. Унда албатта бу каби вазиятлар учраб туради. Жамоамизда бир-бирини ўрнини тўлдирадиган ўйинчиларимиз етарли.
Жаҳон чемпионати бўлиб ўтган стадиондан таассуротларингиз қандай?
Миржалол Қосимов: Таассуротларимизни эртанги ўйиндан кейин айтамиз. Албатта, Жаҳон чемпионати бўлиб ўтган стадионда ўйнаш футболчилар учун ёқимли.
Санжар Турсунов: Қатар мамлакатини Жаҳон чемпионати ўтказилмасидан олдин ҳам яхши кўрар эдим. Мусобақа ўтказилганидан кейинги муҳитдан сўнг таассуротлар ижобий.
«Ал Араби» футбол клубини мағлубиятга учратиб мусобақадан чиқариб юборишни мақсад қилганмисиз? Худдики, «Ал Гарафа» шундай қилганингиз сингари.
Миржалол Қосимов: Мақсад гуруҳга чиқиш!
*** Осиё Чемпионлар лигаси саралаш босқичи доирасидаги "Ал Араби" — ОКМК учрашувидан олдин мезбонлар бош мураббийи Юнус Али матбуот анжуманида иштирок этди.
"11 йиллик танаффусдан сўнг гуруҳ босқичи йўлланмасини қўлга киритиш учун бор имкониятимизни ишга соламиз. Шогирдларимнинг керакли натижа қайд эта олишига ишонаман. Гарчанд ОКМК Ўзбекистон чемпионатида кўп ўйин ўтказган бўлса-да, мухлисларимизнинг қўллаб-қувватлови кучли ўйин кўрсатишимизга туртки бўлади. Чемпионлар лигаси доирасидаги муҳим ўйинга тайёрланиш учун Европада йиғин ўтказдик. Арон Гуннарссоннинг жароҳатини ҳисобга олмаса, жамоада барча бўлажак ўйинга шай ҳолатда", деди қатарлик мутахассис.
