Нур билан қопланган орзу

 Уч ойдан кейин ўзбек футболининг ёрқин умиди Холматов ва 48 ёшли афсонавий гимнастикачи Чусовитина Париждаги Олимпия қишлоғида бирга мулоқот қилишлари мумкин. Чусовитина барча спорт турларини ҳисобга олганда аёллар ўртасида энг кўп - 9-Олимпиадасига йўл олишга интилаётган бўлса, Холматов саёҳатининг бошида. Яқинда бошланган 23 ёшгача бўлган ёшлар ўртасидаги Осиё Кубогига тайёргарлик кўраётган (суҳбат ўтган ҳафта уюштирилган - PS) 21 ёшли футболчи ФИФА расмий сайтига интервью берди. Унда иқтидорли ўзбек ярим ҳимоячиси оилавий алоқалар, буюклардан ўрганганлари ва Олимпия мақсадлари ҳақида гапириб берди. У Парижда ўзбек афсонаси билан Олимпия саҳнасини баҳам кўриш шараф эканлигини айтди.

«Олимпиадада ўзбекистонлик спортчиларни кўриш ва улар билан Париждаги чиқиш туйғуларини баҳам кўриш жуда қизиқ бўларди. Ўзбекистонда бир қатор мусобақаларда медаллар учун курашаётган кўплаб таниқли спортчилар бор, айниқса Оксана Чусовитина. У нафақат мамлакатимизда, балки бутунжаҳон гимнастика афсонаси ҳисобланади. У илк марта 1992 йилда Ўйинларда қатнашган ва бўлажак Олимпия ўйинлари фаолиятидаги 9-си бўлади! Унинг профессионаллиги, чидамлилиги ва спортда узоқ умр кўриши бунга мисолдир».

Холматов илҳомини уйига янада яқинроқ - отаси - профессионал футболчи бўлган Акмалдан олиши мумкин. Иккаласи ҳам Ўзбекистоннинг 16 карра чемпиони «Пахтакор»нинг машҳур кўк-сариқ формасини кийганлиги сабабли, ота ва ўғил ўртасидаги алоқа жуда чуқур.

«Футбол йўлим бошланган ва бугун ҳам давом этаётган «Пахтакор» академиясининг тарбияланувчисиман. Мен Лионель Мессига қойил қолган бўлсам-да, бошқа кўплаб ўйинчилар сингари, отам ҳам менинг асосий намунам бўлиб қолмоқда. У ҳам «Пахтакор»да ўйнаган ва унинг рақами ҳам меники каби «8» эди. Биз ҳатто битта позицияда ўйнаймиз!»

Ёшлар даражасида Ўзбекистон сўнгги йилларда 17 ёшгача бўлган ўсмирлар ўртасида ўтган йилги жаҳон чемпионатида чорак финалгача ва 20 ёшгача бўлган ўсмирлар ўртасида ўтган жаҳон чемпионатида 1|8 финалгача етиб борган ҳолда ўсиб бораётган кучни намойиш этмоқда. Бироқ, биринчи Олимпия ўйинлари эришиб бўлмайдиган бўлиб қолмоқда ва 7та муваффақиятсиз саралаш кампаниясидан сўнг Холматов ушбу рекордни ўрнатишга қарор қилди.

«Ўзбекистоннинг Олимпиададаги дебюти барчамиз учун жуда муҳим. Биз бу орзуни рўёбга чиқариш учун барча саъй-ҳаракатларимизни намойиш этишга қарор қилдик. Ўзбекистонда футболни жуда яхши кўришади ва миллий терма жамоани катта ҳиссиёт билан қўллаб-қувватлашади. Шундай экан, бизнинг мақсадга эришишимиз, шубҳасиз, ҳамма учун ғурур ва бахтнинг катта манбаи бўлади».

Холматов катта умид билан кутилаётган ўзбек истеъдодларининг олтин авлодининг асосий қисмидир. «Олтилик» ва «ўнлик»да ўйнашга қодир бўлган марказий ярим ҳимоячи «Ланс» ҳимоячиси Абдуқодир Ҳусанов, Аббосбек Файзуллаев ва Жасурбек Жалолиддиновни ўз ичига олган юлдузлар гуруҳига киради. Холматовнинг сўзларига кўра, жамоанинг бир қисми 23 ёшгача бўлган ўсмирлар ўртасида Осиё Кубогида иштирок этиши ҳали номаълум бўлса-да (фақат Абдуқодир Ҳусановга клуби рухсат бермади - PS), улар учун қадрли ҳисобланган жаҳон спортининг энг катта мусобақасига йўлланма олиш миссиясини бажаришга тайёр.

«Олимпиадага бориш бебаҳо тажриба ва ўзингизни энг юқори даражада исботлаш имконияти бўлади. Мен ҳали ҳам Токио ўйинларидаги Испания ва Бразилия ўртасидаги финал ўйинини яхши эслайман, бразилияликлар қўшимча вақтда 2:1 ҳисобида ғалаба қозонишди, айниқса Малкольмнинг захирадан ўйинга қўшилиб ғалаба голини ургани ҳеч қачон унутилмайди. Олимпиадага чиқиш учун Осиё Кубогида яхши иштирок этишимиз керак ва биз бунга тўлиқ тайёрмиз. Бу ергача 4 йилдан бери катта иштиёқ билан етдик ва максимал имкониятларимизни намойиш этишга тайёрмиз. Рақибларимиз ҳам мусобақага тайёргарлик кўраётганини тушунамиз, лекин биз ўз қобилиятимизга ишонамиз ва ҳар қандай жамоага қарши ўйнашга тайёрмиз».

Холматов ўзбек афсоналари жуфтлиги Максим Шацких ва Тимур Кападзе раҳбарлигида клуб ва миллий даражада ишлаш имкониятига эга бўлганидан қанчалик бахтли эканини билади, иккинчисига U-23ни Олимпия театрига олиб бориш вазифаси юкланган.

«Ёшлигимдан таниқли мураббийлар қўл остида ўйнайман. «Пахтакор»нинг асосий таркибига кирганимдан сўнг, Шота Арвеладзе ва Максим Шацких билан ишлаш бахтига муяссар бўлдим. Ҳар иккиси ҳам ўз мамлакатларида, ўз авлодларида таниқли футболчилар эдилар ва мураббий бўлиб, ўйинчиларга ўзларининг қимматли тажрибаларини етказишди. Энди U-23 терма жамоасида Тимур Кападзедек мураббийга эга бўлиш ҳар қандай футболчининг орзуси. У ёш истеъдодлар билан ишлаш ва ўйинчиларнинг имкониятларини очиш қобилиятига эга бўлган ажойиб мутахассис. Кападзе мен билан бир хил позицияда ўйнаган, шунинг учун менга жуда кўп муҳим маслаҳатлар беради».

Европанинг бир қатор топ-клублари уни кузатишмоқда. Юлдузли кўтарилишда давом этар экан, Холматов чўққига чиқиш йўлини ўйлаб, нима учун Ўзбекистон техник жиҳатдан иқтидорли футболчиларни қўйиб юборишда бундай ғурурли рекордга эга эканлигини тушуниши мумкин.

«Ўзбекистон ҳар доим иқтидорли футболчиларни тарбиялаган ва ривожлантиришда давом этмоқда. Ёш футболчиларнинг муваффақияти уларнинг тинимсиз меҳнатсеварлиги, ўз маҳоратини ривожлантириш ва мақсадларига эришиш учун тинимсиз интилиши билан боғлиқ. Бизнинг мураббийларимиз ҳар доим ўйинчиларга ёрдам беришга тайёр. Болалигимга келсак, мен жуда кўп футбол ўйнаганман - «Пахтакор» академиясида ҳам, бўш вақтимда кўчада дўстларим билан ҳам ўйнайверардим. Албатта, отамнинг ўйинларини томоша қилиш менинг юқори даражага кўтарилиш йўлимга ҳам катта таъсир кўрсатди. Мен ёш футболчи учун имкон қадар тўп билан ишлаш, жисмоний ривожланиш, тактикани ўрганиш ва футбол интеллектини ривожлантириш жуда муҳим эканлигига қатъий ишонаман».

Манба: fifa.com, 

М.ПЎЛАТОВ тайёрлади