Рафинья: «Барселона»нинг минимал вазифаси – ЧЛ кубоги!»

Ла Лигадаги ёрқин старт эса Каталония клуби ниҳоят, аввалги даражаси сари дадил қадам ташлай бошлаганидан далолат, барибир. Табиийки, бунда янги бош мураббий Ханс-Дитер Фликнинг хизмати катта. Германиялик мутахассис клуб бошқарувини қўлга олиши билан умидли, лекин охирги мавсумлар ўйин бобида умидсизликка тушган бир қатор футболчиларнинг ишлари юришиб кетди. Жумладан, бирдан самарали ўйнаб кетган бразилиялик вингер Рафинья Диас Ла Лиганинг август ойидаги энг яхши футболчиси бўлди. RAC1 телеканали журналистлари жиддий кўтарилишни инобатга олган ҳолда, Рафиньяни суҳбатга чорлашди ҳамда ижобий ўзгариш негизига қизиқишди...

«Барселона»дан кетиш хаёли

- Тан олишим керак, орада «Барселона»дан кетиш ҳақида ўйлаганим рост. Зеро, клубдаги дастлабки 6 ой нафақат мен, балки оилам учун ҳам жуда мураккаб ўтди. Фақат ЖЧ-2022дан кейин барчаси бироз осонлашди ва ўша мавсумни нисбатан яхши якунладим. Шу тариқа хотиржамлик келди, лекин бошида роса қийналдим, айниқса, янги муҳитга мослашиш масаласида. Аслида нима қилиш кераклигини билардим, лекин ҳаммаси шу даражада мураккаб тус олиши мумкинлигини сира ўйламагандим. Бунинг таъсирида маълум муддат миямни кетиш ҳақидаги хаёллар чулғаб олди. Тушунарлики, «Барселона» - гранд жамоа. Шундай экан, янги футболчининг клуб тизимига бирдан киришиб кетиши қийин, албатта. Қисқаси, бошида айрим муаммоларга сира кўниколмадим, муҳими, қийинчиликлар тезда чекинди. Ҳа, жорий мавсум бошида ҳам жамоадан кетишим ҳақида миш-мишлар тарқалди, лекин бу оддий ҳолат. Зеро, замонавий футболда ҳар куни турли янгиликлар пайдо бўлади, асоссизлари эса охир-оқибат, ҳаммани зериктиради. Айни пайт фақат «Барселона»даги истиқболим ҳақида бош қотиряпман. Ҳар мавсум аввалгисига нисбатан яхшироқ ишлаш ва шу жамоада узоқ йиллар ўйнашга қодир эканлигимни исботлашни хоҳлайман. Тушунарлики, бошқа клублардан етарлича таклифлар олдим, лекин ҳозирда мен учун энг мақбул вариант - бу «Барселона»нинг ажралмас қисмига айланиш. 

Сардорлик боғичи 

- ОАВда ногаҳон жамоадан кетаётганингиз, чунки раҳбарият сизга ортиқ ишонмаётгани ҳақида ўқийсиз. Ёки матбуотда сиз ҳақингизда қандайдир салбий фикрлар ёзишади. Шуларни назарда тутган ҳолда, «Барселона»да сардорлар қаторига қўшилишим мумкинлигини асло ўйламагандим. Амалда шундай мақомга муносиб кўрилдим - бу жуда ҳаяжонли ва менга катта ишонч бағишлади.

Флик vs Хави

- Ҳозир жисмоний тайёргарликка бироз кўпроқ вақт ажратиляпти. Умуман, ҳар бир мураббийда ўзига хос иш услуби бор. Хави ҳам аниқ ғояга эга эди, яъни тўп назоратига кўп эътибор қаратарди. Фликнинг ёндашуви эса бироз бошқача. Унинг фикрича, кучли жисмоний фаоллик жамоага кўпроқ фойда келтиради ва натижа ҳам беради.

Янги мавсум учун вазифалар

- Минимал вазифа - ЧЛда ғалаба қозониш. Бошқача бўлиши мумкин эмас. «Барселона»да ўйнаш мақсадингиз барча совринларни қўлга киритиш эканлигини англатади. Агар шундай клубда бўлсангиз ва ғалабалар ҳақида ўйламасангиз, унда ўсишга эришолмайсиз.

Футболчиликнинг мураккаб томони

- Яширмайман, баъзи пайтлар ҳаммасидан воз кечиш, футболдан бутунлай кетиш ва оддий одамлардек яшашни хоҳлаганман. Бинобарин, бу йўналиш катта сабр талаб этади. Дейлик, кечқурун чарчаган ҳолда уйга қайтасиз ва эртаси куни яна машғулотларга боришингиз керак, шунда бошқа ишларга вақт ажратолмаслигингизни ўйлаб, беихтиёр сиқиласиз. Яширмайман, бундай ҳолатларда кўп марта  йиғлаганман, ҳаттоки, «Барселона»да ҳам. Ҳозиргача руҳшунос билан ишлайман, чунки бу жуда муҳим. Ахир тушкунликка тушиб, ҳаммасидан воз кечиб юбориш ҳеч гап эмас…

М.ПЎЛАТОВ тайёрлади