Ракурс: Япония қадрияти ва маданияти уйғун!

 Японлар ҳар доим ҳам ЖЧ гуруҳ раундидан ўтишмайди, лекин инсонларга муносабат борасида чинакам ўрнак кўрсатишади. Улар бу масалада ҳақиқий чемпионлар!

Япония қадриятлари ва маданияти Қатар мундиалида ҳам эътибор марказида, албатта. Мана, «самурайлар» турнирга қудратли Германия миллий жамоасига қарши оғир ўйин билан киришдилар ва ўз анъаналарига ҳар томонлама содиқ қолишди. Биринчидан, Япония миллий термаси футболчилари ўйиндан олдинги жамоавий суратга тушиш чоғи биринчи қаторнинг қоқ ўртасига бош ошпаз Ниши Йошитерага жой ажратишди. Эътиборлиси, бунда жамоанинг овқатланиш тартибига мутасадди шахс қўлига сардорлик боғичини ҳам тақиб қўйишди. Бу - футболда ҳар доим четда қолиб кетувчи инсон хизматига эътибор намунаси. Зеро, Йошитера фаолияти давомида 5-жаҳон кубогида қатнашмоқда, албатта, «самурайлар» ошпази ролида. 

Иккинчи томондан, япониялик мухлислар юксак маданият эгаси эканликларини намойиш этишмоқда. Улар хусусан, Германия термасига қарши ўйиндан сўнг бутун «Халифа» стадио­ни трибуналарини тозалаб чиқишдан эринишмади. Хуллас, Қатарда Япония қадриятлари ва маданияти уйғун ҳолда кўзга ташланмоқда.

МУҲАММАДСОДИҚ тайёрлади