Ҳакамлар қўмитасини профессионаллар бошқарса...

У ўз рекордини Россия ва Қатар мундиалларида янгилашини кутгандик. Бироқ рус ўлкасида ёрдамчиси Абдуҳамидилло Расуловнинг жароҳати сабаб ўйинлари сонини оширолмади, Қатарга эса Равшан Сайфиддинович ЎФА биринчи вице-президенти сифатида ташриф буюради.

*** 

- Қатарда биздан ҳакамлар бўлмайди. Ваҳоланки, Ильгиз Танташев бунга муносиб эди. Буни июнь ойида ЖЧ саралаши «плей-офф» босқичи доирасида ўтказилган БАА - Австралия ўйинидаги ишини кўрган одам сифатида айтяпман. Шунингдек, БАА вакили Муҳаммад Абдулланинг Коста-Рика - Янги Зеландия учрашувини қандай бошқарганини ҳам кўрдим. Якунда фикрим бошқа кўплаб мутахассисларники билан муштарак бўлди: Танташев ўз ишини қойиллатди, унинг амирлик ҳамкасби эса - йўқ. Аммо Танташев ёки ўзбекистонлик бошқа бирор ҳакам кейинги жаҳон кубогига борадими-йўқ, бу мунтазам равишда ўзимизга беришимиз керак бўлган саволдир.

Энди Ильгизга ўша ўйиндан кейин айтганларимни келтирсам: «Ҳакам сифатида ўсишингда кимнингдир ёрдамини кутмаслигинг керак. Эрматов, Коваленко, Фарҳод Абдуллаевдан ибрат ол. Улар барчасига ўзлари эришишди. Машғулотларни ўзлари ташкил этишди, машқлар дастурини тузишди, массажчилар, физиотерапевт-ларни ёллашди. Ҳаттоки, инглиз тили дарсларини ҳам ўзлари учун ташкил этиб, харажатларини ўз чўнтакларидан қоплашди. Уларда мақсад бор эди, унга қандай етишни билишарди ва етишишди ҳам». Бу сўзлар, бир йил аввал «Фарҳод Абдуллаевнинг юртимиздан кетгани яхши бўлди, барибир, унинг нафи тегмасди» деган шахс Ўзбекистон Ҳакамлар қўмитаси раҳбарлигига келганидан аввал айтилганди. Яъни Саудия Арабистони футбол федерацияси ҳакамлар департаменти раислиги (бундан аввал Марк Клаттенбург ишлаган) лавозими ишониб топширилган, жаҳондаги 10 нафар етакчилардан бири бўлган мутахассис ўша «бошлиқ»нинг фикрича, ўз юртига ҳеч нарса беролмаслиги мумкин экан. Аммо ўша «бошлиқ»лар ҳозирги ҳакамлар VAR тизимида ишлаш ҳуқуқини берадиган сертификатни айнан Абдуллаев бошқарувидаги семинарлардан кейин олишганини айтишни унутишмоқда. Ўтган бир йил ичида қанча VAR ҳаками чиқди? Йўқми?

Агар Ўзбекистондан Эрматов ва Коваленко даражасидаги ҳакамлар тизимли асосда чиқишларини истасак, ҳакамликни профессионаллар бошқаришлари керак. ФИФАдаги Коллина ва Бузакка, ОФКдаги Шамсул Майдин, Қатардаги Нажи Жуайни сингари. Бизда эса бу лавозимга кимнингдир дўсти ва ҳимояси остидагиларни тайинлашни маъқул кўришмоқда.

Алишер НИКИМБАЕВ