Артур: «Энфилд» - бу фантастик муҳит»

Бразилиялик футболчи янги клубида 29-рақамни танлади ва «қизиллар» расмий сайтига берган илк интервьюсида жорий мавсумдан кўп нарса кутаётгани хусусида баралла гапирди.

- Артур, хуш кўрдик! Ҳиссиётлар қандай?

- Албатта, миллиардлаб инсонлар меҳрини қозонган улкан клуб футболкасини кийганимдан хурсандман. Тўғриси, ҳозир худди туш кўраётгандекман.

- Нима учун айнан «Ливерпул»ни танладинг?

- Ўзаро муҳокамалар чоғи ғоя-қарашларим клубникига мос келишини англадим. Танловда адашмаганимга аминман. Ҳозир ғайратим тўлиб-тошяпти ва бу ерда боримни беришга тайёрман. Олдин «Энфилд»да «қизиллар»га қарши ўйнаганман, ўшанда стадиондаги фантастик муҳитдан ҳаттоки, гангиб қолгандим. Энди ажо­йиб мураббий ва футболчиларга эга катта клубдаман - бу чиндан ҳам, тушга ўхшайди.

- Ярим ҳимоянинг турли позицияларида ўйнай оласан. Хўш, услуб бўйича АПЛга нечоғли мос келасан?

- Ҳамиша салоҳиятимни Анг­лияда синаб кўришни хоҳлаганман. Бу ерда ҳаммасига улгуришинг талаб этилади - рақибни кўздан қочирмаслик, ҳужумга ўтиш, гол уриш... Қайтараман, ғайратга тўламан ва ўзимни ҳақиқий жангчидек ҳис қиляпман. Бунга қадар кўп шуғулландим, энди меҳнат самарасини кўрсатиш вақти келди.

- Юрген Клопп ҳақида нима дея оласан?

- Дунёдаги энг яхши мураббийлардан бири. Футболчилар билан дўстона муносабат ўрнатадиган, уларга қўшилиб ўйнайдиган ақлли, ҳиссиётли инсон. Тўғри, Клопп майдонга тушмайди, лекин жамоа билан бирга ўйнаётгандек туюлади, барибир. Ёнингизда шундай мураббий бўлиши нақадар яхши.

- Нима учун айнан 29-рақамни олдинг?

- «Гремио»да шу рақам остида ўйнагандим. Эҳтимол, бу танловимда қандайдир хурофот бордир. Умуман, «29»ни яхши кўраман ва ишонаманки, у менга яна катта омад келтиради. 

- «Ливерпул»да ижара муддатини ўтайсан. Жорий мавсум учун ўз олдингга қандай вазифалар қўйдинг?

- Мақсад тайин - энг яхши футболимни қайта кашф этиш. Энг муҳими, ўзимни яхши ҳис қилишим керак. Шунда мураббий ишончини оқлаб, жамоага етарлича наф келтира оламан. «Ливерпул»дек катта гуруҳда ҳамиша совринлар ютишга интилиш керак. Менимча, ҳозирги жамоа катта ишларга қодир.

- Янги клуб, бошқа давлатга кўчиб ўтиш ҳамиша қийин жараён. Муҳими, «Ливерпул»да дўстларинг кўп. 

- Албатта, кўникиш осон эмас. «Ливерпул»нинг кўплаб футболчилари билан терма жамоада бирга ўйнаганман -  Алиссон, Фабиньо, Роберто Фирмино. Ишончим комил, улар бу ерга мослашишимда катта ёрдам беришади.

- Мухлисларга гапинг бўлса, марҳамат...

- Аввало, менга юборилган яхши хабарлар учун раҳмат. «Ливерпуль» футболкасини кияр эканман, хоҳиш ва интилиш шунга яраша бўлади. Мухлислар мендан чиройли ўйин кутаверишсин…