Ушбу пост орқали турнирлар ташкил этишда ОФКнинг энг ишончли ва масъулиятли ҳамкорларини билиб олиш мумкин. Бунда фақат қитъа даражасидаги терма жамоалар турнирлари (U-17, U-20, U-23, миллий жамоалар ва футзал бўйича Осиё чемпионати) ҳисобга олинган.
Демак, жорий асрда ОФК терма жамоалари мусобақаларига мезбонлик қилиш борасида Ўзбекистон олдинда бормоқда. Мамлакатимизда ҳозирга қадар 2 марта U-17 (2008, 2010), 1 мартадан U-20 (2023) ва U-23 (2022) тоифасидаги Осиё чемпионати ташкил этилди. Футзал бўйича Осиё кубоги эса юртимизда 3 марта (2006, 2010, 2016) меҳмон бўлди. Демак, умумий ҳисобда 7 марта мезбонлик. Кейинги ўринларда Таиланд (6 марта) ва БАА (4 марта) бор. ОФК бу даврда Эрон, Вьетнам ва Малайзияга 3тадан турнирни ишониб топширган.
Эътиборли факт: ЖЧ-2002 мезбонларидан бири Жанубий Корея ортда қолган 22 йил давомида Осиё миқёсидаги бирор йирик турнирни қабул қилгани йўқ. Австралия ва Саудия Арабистони эса атиги 1тадан мусобақага ўз бағрини очди.