Фанатлар чинакам «тозалов»дан ҳайратда!

Ҳар ҳолда, аввалги йилларга таққослаганда, Париж гранди жуда кўп ортиқча ўйинчилардан қутулди. Улкан «тозалов» ишлари - жамоанинг янги спорт директори Антеро Энрике «имзо»си! Ҳа, бразилиялик Леонардо ўрнини эгаллаган функционер трансферлар бўйича бор масъулиятни ўз зиммасига олиб, янги бош мураббий Кристоф Галтьега кераксиз футболчиларнинг аксарияти учун вариантлар топишда қойилмақом иш олиб борди. Шу тариқа «ПСЖ» нақ 26 нафар футболчи (!) билан хайрлашди. Жумладан, муаммоли Мауро Икарди ҳам Париждан Туркия томонларга «учди».

Хуллас, «ПСЖ» мухлислари Антеро Энрике томонидан трансферлар бозорида олиб борилган иш ҳажмидан ҳайратдалар. Улар ижтимоий тармоқларда ўз ҳайратларини турли тарзда баён этишдан сира чарчашмаяпти. Энрикенинг парижликларни қай даражада сеҳрлаганини англаш учун бир неча изоҳлар билан танишиб чиқиш кифоя қилади. Жумладан, унинг иши 1944 йилнинг 25 августидаги тарихий воқеа (Париж фашистлардан озод этилган)га қиёсланмоқда: 

- Энрике ёзги трансферлар бозорида чинакам қаҳрамонлик кўрсатди. Қаранг, клуб бир уринишда Ареола, Эррера, Вейналдум, Гуйе, Курзава, Керер, Икарди ва Дракслердан қутулди. Очиғи, 1944 йилнинг 25 августидан буён Париж бундай озодлик ҳаракатини кўрган эмасди.

- Агар тарих фани ўқитувчиси Парижни озод қилишда ким асосий ижрочи бўлганини сўраса, унга лўнда жавоб берардим: «Антеро Энрике».

- Антеро битта трансфер кампаниясидаёқ Леонардони чинакамига камситди.

- Клуб 20 нафар футболчини қўйиб юбориши ҳақида хабар чиққанида, матн теришда хато кетгани ҳақида ўйлагандим. ЭНДИ УЗР СЎРАЙМАН!!!

- Антеро кучли, жуда кучли. Ҳозирча унинг ишидан 100 фоиз қониқмадим, лекин шунча кераксиз футболчидан қутулиш ортида катта ҳаракат борлиги тайин. Леонардо спорт директори лавозимида қолганида, ҳозир нима бўларди? Буни тасаввур қилиш ҳам қўрқинчли...

А.АҲМЕДОВ тайёрлади