Ҳаммаси Месси ҳақида...

Reuters хабарига кўра, Саудиянинг «Ал-Ҳилол» клуби 35 ёшли аргентиналик юлдузга шартнома таклиф қилган. Аввалроқ, Ар-Риёд клуби Мессига йиллик 400 миллион евро маошли келишув тақдим этаётгани хабар қилинганди. Саудия Арабистони туризм элчиси саналмиш Лионель ҳафта бошида бу мамлакатга хизмат сафари билан боргач, мамлакат ҳукумати Мессини «Ал-Ҳилол»га таклиф этиш масаласини кўриб чиққан. Саудия қироллик оиласи Месси ва Роналду ўртасидаги рақобатни Саудия Арабистони чемпионатида кўрмоқчи. Криштиану ҳозирда «Ал-Наср» шарафини ҳимоя қилмоқда. Аввалроқ, Месси ёзда «ПСЖ»ни эркин агент сифатида тарк этиши аниқ бўлиб улгурганди.

Футболчининг ўзи «Барса»га ўтмоқчи ва жаҳон чемпиони олдида «Барселона» варианти ҳам турибди. Испанянинг AS нашри хабар беришича, Лионель Мессининг каталонияликлар олдига қўйган талабларидан бири - бир вақтлар ўзига тегишли бўлган 10-рақамни қайтариш экан. Ҳозир бу рақам остида «Мессининг вориси», деб тан олинган Ансу Фати тўп тепмоқда. 20 ёшли футболчи қайсарлигини кўрсатди. Фати 10-рақамни Мессига қайтаришдан бош тортгани айтилмоқда. Шунингдек, «Барселона» жароҳатлардан кейин аввалги даражасига чиқа олмаган бу ўйинчидан қутилмоқчи. Ансунинг ўзи Каталонияда қолишини таъкидламоқда. Унинг шартномаси 2027 йилнинг ярмигача давом этади.

Энди аргентиналик жаҳон чемпиони олдида янги вариант пайдо бўлди. Маълумотларга қараганда, 35 ёшли жаҳон чемпионини Англия Премьер-лигасида кутишмоқда. Goal нашрининг ёзишича, Англиянинг номи сир тутилаётган бир неча клуби Мессини ўз сафида кўрмоқчи. Улар тез орада футболчи вакиллари билан музокара ўтказишга тайёр.