Кароматсиз юлдузли ҳужум...

Бироқ юлдузли ҳужумга эга Дидье Дешам жамоаси ҳали ўйин ҳолатидан гол урганича йўқ. Францияликлар икки автогол ва 1та пенальти самараси ўлароқ, кучли 8таликка киришди. Ваҳоланки, Дешам ихтиёрида Килиан Мбаппе, Усмон Дембеле ва Антуан Гризманн каби топ-ижрочилар етарли.

Тарихга назар ташласак, Франция термаси муваффақиятсиз якунланган Евро-2008да атиги 1та гол билан чекланган. Евро-92да эса 2та гол билан гуруҳда қолиб кетган. Умуман, Евро-2024 фаворитлари қаторида тилга олинаётган Франция термаси охирги 2та қитъа биринчилигида атиги 3та ғалаба қайд этган бўлса, барчаси 1:0 ҳисобида ва автоголлар эвазига. Рақибнинг ёрдамисиз расмийлаштирилган охирги ғалаба эса Евро-2016 ярим финалига тўғри келмоқда. Ўшанда францияликлар Антуан Гризманн урган 2та гол ҳисобига немислардан устун келишганди.

Факт. Франция терма жамоаси Германиядаги 4та ўйинда рақиблар дарвозаси томон 66та зарба йўллади, шундан 16таси аниқ чиқди. Жамоада xG (кутилган гол) кўрсаткичи 6,7ни ташкил этди, аммо ўйин ҳолатидан ҳали гол йўқ...
***
- 1984 йилдан бери мезбонлар Евро ғолиби бўла олмаяпти. Охиргиси Франция эди.
- Франция сўнгги 5 та йирик турнирнинг 4 тасида яримфиналга чиқди.
- Франция — Евролар тарихида энг кам гол (3) билан яримфиналга чиққан жамоа
***
Айтганча, Франция миллий жамоаси бош мураббийи Дидие Дешам Евро-2024 1/4 финалидан ўрин олган Португалияга (0:0, пен — 5:3) қарши ўйиндан сўнг журналистлар саволларига жавоб берди. 
«Сардор ва вице-сардор ёмон ўйнаяпти? Сиз жуда кескин гапиряпсиз, мен доим ўз футболчиларимни ҳимоя қиламан. Сабаблари бошқача. Килиан Мбаппе ва Антуан Гризманн ўзларининг қобилиятлари билан солиштирганда, энг яхши футболни кўрсатишмаяпти. Шунга қарамай, биз бу босқичга етиб келдик. Улар бизга самарадорлик билан ёрдам беришлари керак, аммо бизда бу етишмаяпти. Лекин футбол — жамоавий ўйин. Ҳаммаси футболчиларнинг тажрибасига боғлиқ эди. Биз Оливиени туширмоқчи эдик, аммо улгурмадик. Мбаппенинг алмаштирилиши? У ҳар доим мен ва жамоа билан ростгўй. Бурун жароҳати уни безовта қилмоқда. Гол урмай яримфиналга чиқдик? Автогол ҳам гол ҳисобланади. Рақибларда ҳам имкониятлар бўлса-да, унчалик самарали бўлмади. Бизга кўп гол уриш муҳим эмас. Тўп ўтказиб юбормаслик яхшироқдир. Лекин, албатта, кўпроқ гол уришимизни афзал кўраман.
Жамоа ЖЧдагидек эмас? Биз кўпроқ гол уришимиз керак. Бу ҳақиқат. Ҳозирча голлар етишмаяпти», — дейди французлар устози.