СТАТИСТИКА: Татимаган юбилей ўйин

Гап ОКМКнинг Олмалиқда Ироқнинг «Ал-Қува Ал-Жавия» клубига 1:2 ҳисобида ютқазганида ҳам эмас. Шунчаки, унинг шогирдлари ўйинни ўта суст бошлашди, аксарият ҳолатларда тушунарсиз ҳаракатланишди. Учрашувдан сўнг Миржалол Қўшоқовичнинг ўзи ҳам ҳеч нарсага тушунмагани, фаолиятида илк марта шундай иштиёқсиз футболга рўбарў келганини таъкидлади. Лекин қуйидаги статистика ОКМК мағлубияти эмас, балки Ўзбекистон клубларини ОЧЛда майдонга бошлаб тушган мураббийлар ҳақида (манба - cham-pionat.asia). Зеро, мураббийлар кўрсаткичи бўйича айнан Миржалол Қосимов олдинда.

Мана, ОЧЛ-2023/2024да гуруҳ босқичининг дастлабки 2та тури ортда қолди. Ҳозирда Осиё клублари бош турнирида мамлакатимиз жамоа­лари бош мураббийи ролида энг кўп ўйин ўтказган мутахассис - бу Миржалол Қосимов. ОКМК - «Ал-Қува Ал-Жавия» қарама-қаршилиги вақтида «Бунёдкор»ни ҳам қитъанинг энг нуфузли мусобақасида майдонга бошлаб тушган Қосимов учун юбилей - 50-ўйин бўлди. Футболимиз афсонаси шунча ўйинда 20та ғалабани таъминлаган ва унинг жамоалари 65та гол урган. «Насаф» шу кунга қадар ОЧЛда жами 38та ўйин ўтказган бўлса, уларнинг барчаси Рўзиқул Бердиевга тегишли. Ўйинлар сони бўйича рейтингнинг кейинги ўрнида марҳум Виктор Жалилов бор - 26та. Маълумот учун, таниқли мутахассис ОЧЛда «Пахтакор» ва «Машъал»ни бош мураббий сифатида майдонга бошлаб тушган.

4-5-ўринлар «Локомотив»нинг собиқ устози Андрей Микляев ва «Нефтчи» афсонаси Юрий Саркисянга тегишли - 22тадан ўйин. «Бунёдкор»да 3 мавсум ишлаган Сергей Лушан бу орада «қалдирғочлар» билан ОЧЛнинг 21та ўйинини кўрган. «Навбаҳор» билан ОЧЛдаги дастлабки ғалабасини тантана қилган Самвел Бабаян жами ўйинлар сони бўйича «Локомотив»нинг собиқ устози Вадим Абрамовдан ўзиб кетди яқинда. Энди Самвел Вячеславовичда 9та ўйин бор, Вадим Карленович эса «темирйўлчилар»га 8та баҳс­да бошчилик қилган. Максим Шацкихнинг ОЧЛдаги дебюти эса ўта омадсиз чиқди - «Пахтакор» бошқарувидаги дастлабки 2та ўйинда 2та мағлубият (голлар нисбати - 0:5).

Ўзбекистон клубларини ОЧЛ­да бошқарган хорижлик мураббийлар орасида эса грузиялик Шота Арвеладзе пешқадам - 15та ўйин. Катта эҳтимолки, бу йил Рўзиқул Бердиев турнирдаги 40-ўйинини нишонлайди, Самвел Бабаян эса кейинги турда 10та ўйин маррасига етади.

Ўзбекистон клубларини ОЧЛда бошҚарган мураббийларнинг умумий статистикаси

    Мураббийлар                 Ў           Ғ         Д         М          Т-Н       О

1. Миржалол Қосимов         50        20        15        15        65-62    75

2. Рўзиқул Бердиев             38        13        9          16        41-49    48

3. Виктор Жалилов              26        15        4          7          42-34       49

4. Андрей Микляев              22        6          9          7          28-26      27

   Юрий Саркисян                 22        8          1          13        26-38    25

6. Сергей Лушан                  21        3          5          13        16-31       14

7. Равшан Ҳайдаров                        17        6          4          7          24-26       22

8. Шота Арвеладзе              15        8          3          4          20-15     27

9. Тачмурад Агамуродов    14        6          3          5          17-12       21

10. Самвел Бабаян              9          3          4          2          11-9        13

    Луиз Фелипе Сколари     9          4          1          4          14-15       13

12. Вадим Абрамов              8          2          1          5          14-15        7

13. Амет Мемет                                7          3          2          2          6-9          11

    Андрей Фёдоров              7          2          1          4          10-12        7

15. Валерий Непомняший   6          3          1          2          11-7         10

    Нўъмон Ҳасанов              6          3          1          2          10-9         10

    Миодраг Радулович        6          3          0          3          8-10         9

    Питер Хюистра                 6          1          4          1          6-8           7

    Мурод Исмоилов             6          2          1          3          6-9           7

    Деян Журжевич                6          2          1          3          6-10         7

    Славче Войнески             6          2          0          4          10-15        6

22. Александр Волков         5          2          0          3          5-8           6

23. Зико                                             2          1          0          1          1-3           3

     Ҳаким Фузайлов              2          0          0          2          3-6           0

     Максим Шацких              2          0          0          2          0-5            0

Сергей КНЯЗЕВ, махсус мухбир