Яна ФИФА рейтинги ҳақида

Кутилмаганлик шуки, навбатдаги рейтингни КОНКАКАФ «Олтин кубоги»дан сўнг, 20 июль куни эълон қилиш режалаштирилганди. Умуман, айнан 20-санада рейтинг яна янгиланади, фақат унда катта ўзгариш сезилмайди. Кичик ўзгаришларнинг Ўзбекистон термаси, хусусан, ОФК миқёсидаги ЖЧ-2026 саралаши қуръасининг биринчи саватчасига таъсир қилмаслиги аниқ. Ўзаро ўйиндаги ғалабага қарамай, Уммон термасидан узиб кетолмаган Ўзбекистон миллий жамоаси 2-саватчада қолди. Дарвоқе, Марказий Осиё кубогидан ўрин олган ўша ўйин 1 кун кейин ўтказилганида ҳам, ҳозир рейтингда Уммон ва Ўзбекистон термалари ўрин алмашарди. Гап шундаки, кўп марта ёзганимиздек, ФИФА кунларидан ташқарида ўтказилган ўртоқлик ўйинлари қиймати икки ҳисса паст бўлади. Дарвоқе, эълон қилинган рейтингда Марказий Осиё чемпионати «плей-офф» ўйинлари натижаси ҳисобга олинмаган. Яъни Ўзбекистон - Эрон (0:1) ва Қирғизистон - Уммон (0:1) ўйинлари ҳисобга олинмаган (ҳозирча). Акс ҳолда, Уммон термаси рейтинг­да БАА жамоасидан олдинда бўларди.

Алишер НИКИМБАЕВ («Футболиум»)