Сречко Катанец: " Ҳимоявий ўйнаш айб эмас ва..."

- Натижадан қониқмадим. Бутун ўйин давомида ҳужумлар қилавердик, аммо гол ура олмадик.
Мен рақиб бунчалик зич ҳимояланишини кутмагандим. Бу ноқонуний эмас, албатта. Сурия терма жамоаси шунчаки бункер қурди. Сиз рақиб қандай ўйнаса, шунга мослашишингиз керак. Ҳимоявий ўйнаш айб эмас. Тажрибамда кўп ўйинларни шу тарзда ютқазганман.

Йигитларга ҳеч нарса дея олмайман. Сурия 90 дақиқа ҳимояланди. Қандай гол уришни била олмадик. Бошқа айтадиган гапим йўқ. Албатта, таркибдаги юқотишларнинг таъсири бор. Хусусан, Элдор энг муҳим ўйинчимиз эди. У Ўзбекистон термасига келганимдан бери 10-15 та гол урди. Элдор ҳар сафар жамоага кўпроқ нарса бераверарди. Жамоада энг зўр ҳужумчингиз бўлмаса, доим қийин бўлади. Бундай мусобақаларда Элдорсиз муаммоларга дуч келишимиз аниқ эди. Аргентина ҳам Месси бўлмаса умуман бошқа жамоага айланади. Бизда ҳам ҳолат шундай.

Бизда ҳужумчилар билан муаммо бор, гол уришда қийналяпмиз. Муаммо фақат ҳужумчиларда эмас. Тўп билан секин муомала қиляпмиз, бироз тезкорроқ ҳаракат қилиш керак. Шундагина, бўш зоналар очиб, гол уришимиз мумкин бўлади.