Суперлигага жавоб...

Эндиликда мусобақанинг умумий бюджети 500 миллион еврога ошиб, 4,8 млрд. еврогача етди. Маълум бўлишича, Суперлига хавфи туфайли УЕФА мукофот пулларини қайта кўриб чиқишга қарор қилган. Ташкилот ушбу бюджет 2024-2027 йиллар оралиғида амал қилишини белгилаб олган. Умумий суммадан 3,317 млрд. еврони еврокубокларда иштирок этувчи клублар олади: Чемпионлар Лигаси, Европа Суперкубоги ва Европа Лигаси. Дастлабки икки мусобақага ўша сумманинг тахминан 75 фоиз қисми тегади. УЕФАнинг янги стратегиясига кўра барча мукофот пуллари ошади: иштирок этгани учун клуб 19 миллион, 11 миллион - 1/8 финалга чиқа олса, 12 миллион - чорак финал учун, 15 миллион - ярим финал, 20 миллион - финал ва 25 миллион - мусобақадаги ғалаба учун берилади.

Эслатиб ўтамиз, аввалроқ Суперлига 3,5 млрд евро туфайли УЕФАни судга бермоқчи. Маълумотларга қараганда, лойиҳа раҳбарлари янги турнирнинг старти чекловлар ва Александер Чеферин бошчилигидаги Европа футбол ассоциациялари иттифоқининг босими жиддий молиявий зарар етказди, деб ҳисоблашмоқда. Жумладан, Суперлиганинг миллиардлаб евро зарар кўришига, «JP Morgan» билан келишилган мусобақа стартига алоқадор кредит борлиги сабаб сифатида тилга олинмоқда. 2021 йилда томонлар 2,8 фоизга келишишганди, лекин ҳозир гап камида 6,3 фоиз ҳақида кетмоқда. Шунингдек, асосчилар телевизон ҳуқуқлар сотувидан тушиши керак бўлган маблағ бўйича зарарни қопланиши сўралган. Молиявий эътирозлардан ташқари, Суперлига УЕФА Европа Иттифоқи судининг - «УЕФА Европада клублар ўртасида мусобақалар ташкил қилиш бўйича монополияга эга эмаслиги ва янги лойиҳага босим ўтказишга қонуний жиҳатдан ҳаққи йўқлиги» тўғрисидаги қарорини тўлиқ бажармаганликда айбламоқда.