«The Best» учун якуний учликлар маълум

Йилнинг энг яхши эркак футболчиси номинацияси бўйича якуний учликдан ўрин олган Килиан Мбаппе «ПСЖ» билан Лига 1 чемпиони ва Франция билан ЖЧда финалгача етиб борди. Лионель Месси жаҳон чемпиони ва Лига 1 ғолибига айланди. Шу билан бирга, «Олтин тўп» эгасига айланди. Эрлинг Холанд «Манчестер Сити» билан треблни қўлга киритди. Шунингдек, UEFA бўйича йилнинг энг яхши футболчиси, деб топилди.

Йилнинг энг яхши мураббийи бўлиш учун эса Пеп Гвардиола, Симоне Инзаги ва Лучано Спаллеттилардан иборат учлик курашни давом эттиришади. Пеп Гвардиола «Манчестер Сити» билан треблни қўлга киритди, Симоне Инзаги «Интер»ни Чемпионлар лигаси финалига олиб чиқди, Лучано Спалетти эса «Наполи»ни 33 йил ичида биринчи марта «А» серия чемпионига айлантирди. Спаллетти щозирда Италия терма жамоасида ишламоқда.

Йилнинг энг яхши дарвозабони мукофотига номзодларнинг сўнгги учлигидан Эдерсон («Манчестер Сити», Бразилия), Тибо Куртуа («Реал», Бельгия) ва Ясин Буну («Ал-Ҳилол», Марокаш)лар жой олишди. Кенгайтирилган рўйхатдан Андре Онана («Манчестер Юнайтед», Камерун) ва Марк-Андре тер Штеген («Барселона», Германия) чиқиб кетишди.

Энг яхши аёл футболчиси соврини - The Best мукофотига Айтана Бонмати («Барселона», Испания), Линда Кайседо («Реал Мадрид», Колумбия) ва Женнифер Эрмосо («Пачука», Испания) даъвогарлар рўйхатига киритилган. Бонмати ва Эрмосо Испания терма жамоаси таркибида 2023 йилда жаҳон чемпиони бўлишган. Айтана турнирнинг энг яхши футболчиси, деб топилди, Женнифер эса бу тоифада 2-ўринни эгаллади. «Барселона» футболчиси шунингдек ўз клуби билан треблга эришди. Кайседо йил давомида турли ёш гуруҳлари бўйича учта ЖЧда қатнашди. 2022 йилда у Америка аёллар кубогининг энг яхши футболчиси, деб топилди.

Жонатан Хиральдес («Барселона»), Эмма Хейз («Челси») ва Сарина Вигман (Англия т.ж.)лар йилнинг энг яхши аёллар жамоаси мураббийи номинациясида якуний учликдан ўрин олишди. «Barcelona Femini» Хиральдес бошчилигидаги яна бир юлдузли мавсумни ўтказди, у «блауграна»ни кетма-кет 4-унвонга олиб келди, шунингдек, Европа Чемпионлар Лигасида ҳам зафар қучди. ФИФАнинг 2021 йилдаги энг яхши аёллар мураббийи жорий йилда яна мукофотнинг қисқа рўйхатига кирди, чунки «Челси» иконаси Хейз яна бир йил эсда қоларли ишлар қилди. Унинг жамоаси 22/23 йилги мавсумда рекорд даражадаги 6-чемпионликни қўлга киритди. Май ойида у «Челси»ни Англия чемпионати ва Кубогининг 4-дублига олиб борди. Вигман Англия терма жамоасини август ойида ўтказилган аёллар ўртасидаги ЖЧ финалигача олиб чиқди. Бунгача февраль ойида Арнольд Кларк Кубогида ғалаба қозонди.

Йилнинг энг яхши аёл дарвозабони мукофотига Маккензи Арнольд (Австралия т.ж.), Каталина Холл (Испания т.ж.) ва Мери Эрпс (Англия т.ж.)лар якуний учлик сифатида танланди.

«Йилнинг энг чиройли голи» сифатида Ференц Пушкаш соврини учун Хулио Энсисо («Брайтон» - «Манчестер Сити», 2023 йил 24 май), Гильерме Мадруга («Новоризонтино» - «Ботафого СП», 2023 йил 28 июнь) ва Нуну Сантуш («Спортинг» - «Боавишта», 2023 йил 12 март) курашишади.

Эслатиб ўтамиз, мукофотлар 2022 йил 19 декабрдан 2023 йил 20 августгача бўлган даврдаги натижалар асосида берилади. FIFA томонидан йилнинг энг яхши мураббийи соврини 15 январь куни Лондонда ўтадиган тадбирда топширилади.