Германияда фаолият юритадиган transfermarkt портали асосан мунтазам равишда футболчиларнинг бозор баҳосини шакллантириш билан шуғулланади.
Маълумки, Неймар трансфер суммаси бўйича жаҳон футболи тарихида энг қимматбаҳо футболчи ҳисобланади - «ПСЖ» бразилиялик юлдуз учун «Барселона»га 222 миллион евро тўлаган. Бироқ transfermarkt Неймар ҳуқуқини ҳеч қачон бу қадар юқори баҳолаган эмас. Германия портали талқини бўйича айтсак, «Ал-Ҳилол» юлдузи кучли 10таликда ҳам йўқ. Хўш, transfermarkt энг юқори баҳони кимларга қўйган? Топ-рўйхатда ҳатто Эден Азар ҳам бор.
150 миллион евро
«Манчестер Сити»нинг ҳужумкор ярим ҳимоячиси Филип Фоден 150 млн. евро маррасини жорий йил забт этди. Эслатма, у ҳозир 24 ёшда. Эден Азар ва Антуан Гризманн эса бу суммани 2018 йили «бўйсиндиришганди». Ўшанда ҳар икки футболчи 27 ёшда эди. Трансфер қиймати 150 «лимон»га кўтарилган яна бир футболчи - бу Садио Мане. Сенегаллик ҳужумчига 2019 йилда шунча нарх қўйилганди.
160 миллион евро
Яқинда «Арсенал»дан қўним топган Раҳим Стерлингнинг энг юқори кўрсаткичи - 160 млн. евро. Англиялик футболчи ушбу маррани 2019 йили «Челси»да «босганди».
180 миллион евро
Transfermarkt замонамизнинг аксарият топ-футболчилари ҳуқуқини айнан 180 миллион еврогача кўтарган. Хусусан, афсонавий Лионель Месси, шунингдек, Эрлинг Холанд, Жуд Беллингем ва Винисиус Жуниорнинг трансфер қиймати шу нуқтага етган. Аргентиналик даҳоча бу суммага 2018 йили лойиқ топилган бўлса, қолганлар унинг кўрсаткичини яқин орада такрорлашди.
200 миллион евро
Transfermarkt тарихда атиги бир футболчи трансферини 200 миллион еврога муносиб кўрган — Килиан Мбаппе. Франция миллий жамоаси ва «Реал» клуби футболчиси бу довонни 2018 йили атиги 19 ёшида забт этди. У ўша вақт «ПСЖ» сафида ўйнарди.
