Улар гаплашиб олишди...

L`Еquipe хабарига кўра, Неймар Мбаппенинг Чемпионлар лигаси гуруҳ босқичидан ўрин олган «ПСЖ» - «Ювентус» (2:1) ўйинида қабул қилган қарорлари туфайли ғазабланган. Бразилиялик футболчи шунчалик норози эдики, клуб матбуот анжуманида иштирок этишни хоҳлайсизми, деган саволга ҳужумчи шундай деди: «Аминмисиз? Ростданми? Агар бугун журналистлар билан гаплашсам, муаммо туғилади!»

Бир эпизод бразилияликни энг кўп ғазаблантирди: Мбаппе жарима майдончасига ёриб кириб, ўткир бурчакдан дарвозага зарба йўллади, ваҳоланки Неймар ўша пайтда ёлғиз ва очиқ турганди. Натижада эса Килиан мўлжалда адашди.

L`Еquipe хабарига кўра, Неймар ва Мбаппе ўйиндан сўнг учрашиб, муайян вазиятларда бир-бирларини қўлламаганликлари ҳақида гаплашишган.

Аввал хабар қилинганидек, Мбаппе «ПСЖ»нинг штатли пенальтичиси этиб тайинлангани учун футболчилар ўртасида келишмовчилик юзага келди. Неймарга Кристоф Галтьенинг бу қарорини танқид қилган иккита твит ёқиб тушди, бироқ ўшанда можаро бартараф этилганди.

«Ювентус» билан ўйинда франциялик форвард Неймарнинг узатмасидан сўнг голлардан бирини киритиб, дубл қайд этди.