«Манчестер Юнайтед» бош мураббийи Рубен Аморим Португалия чемпионатига қайтиши мумкин. Журналист Крис Уилернинг маълум қилишича, Жоау Нороня Лопеш яқин вақтларда «Бенфика» президенти бўлиш эҳтимоли юқори. У Аморимни жамоанинг янги бош мураббийи сифатида кўришни хоҳламоқда. Шу билан бирга, АПЛдаги омадсиз стартга қарамасдан, «МЮ» раҳбарияти яқин вақт ичида мутахассис билан хайрлашишни режалаштирмаяпти. АПЛнинг 4-туридан сўнг «қизил иблислар» турнир жадвалида 14-ўринни эгаллаб турибди. Улар ҳозиргача атиги 4 очко тўплашга муваффақ бўлди.
The Athletic хабарига кўра эса, манкунианликлар Рубен Аморимни истеъфога чиқарса, унинг ўрнини австриялик мутахассис Оливер Гласнер эгаллашга асосий даъвогар. Клуб раҳбарияти Гласнернинг «Кристал Пэлас»даги фаолиятидан хайратланган. У «бургутлар» билан Англия кубоги ва суперкубогида зафар қучди. Ҳозирда Европа Конференциялар лигасида иштирок этмоқда. 50 ёшли мутахассиснинг ўзи ҳам топ клублардан бирини бошқаришга қарши эмас.
