Қизиқ, кечагина «Барселона»да футболдан безиб юрган Усмон Дембеле «ПСЖ» сафига қўшилиши билан қисқа вақт ичида «Олтин тўп» ютишини ўйлаганмикан? Футбол тарихида жаҳон чемпионати ва Европа Чемпионлар Лигасида ғолиб чиқиш баробарида «ОТ» олганларнинг элит рўйхатига киришничи? Амалда барчаси бирдан ривожланди ва Дембеле футбол тарихида ЖЧ ва ЧЛ кубоги ҳамда «Олтин тўп»ни бирлаштирган атиги 10-футболчига айланди.
***
КОМПАНИ БИРИНЧИСИ!
Жорий мавсумнинг старт қисмидаги «Бавария» рақиблар учун чинакам «жаллод»дек муносабатда бўлди. Жумладан, жамоанинг ғалабали серияси ўлароқ, кўпчилик тан олмаган ёки назарига илмаган мураббий Винсент Компани ҳам тарихий натижа муаллифига айланди. Диққат қилинг, бельгиялик мутахассис футбол тарихида муайян мавсум стартида қўл остидаги жамоанинг қаторасига 10та ўйинда ғалаба қозонишини таъминлаган биринчи мураббий бўлди.
АРГЕНТИНА ТЕРМАСИ ЖЧ-2026
ҒОЛИБИМИ?
Аргентина миллий жамоаси ўз тарихида 3 марта жаҳон чемпиони бўлган. Битта қизиқарли факт: КОНМЕБОЛ вакилининг охирги 2та чемпионлигидан олдин «Олтин тўп» соврини франциялик футболчига насиб этган. Мана, 2025 йили «ОТ» яна франциялик (Усмон Дембеле) г а берилди. Нима, бўлажак мундиал яна «альбиселестлар»га аталадими?
***
АТИГИ 38 ФОИЗ ЎЙИНДА ҒАЛАБА
Рубен Аморим 4 октябрь куни «МЮ» бош мураббийи ролида юбилей - 50-ўйинини қарши олди. Ҳар тугул, «Сандерленд»га қарши ўйин «қизил иблислар» фойдасига ҳал бўлди. Аммо португалиялик мутахассиснинг умумий натижаси жуда паст, барибир. Жамоа унинг қўл остидаги дастлабки 50та ўйиндан атиги 38 фоизини ғалаба билан якунлади. Агар афсонавий Алекс Фергюсон давридан буён «МЮ»ни бошқарган барча бош мураббийларнинг илк 50та ўйиндаги статистикасига қарасак, ҳеч ким Аморим каби ёмон старт олмаган. Тўғри, энг яхши стартни қайд этган Эрик тен Хаг қандай тугатгани ҳаммага маълум. Дастлабки 50та ўйинда жуда ёмон кўринган Алекс Фергюсоннинг умумий натижалари ҳам кўпчилик ёдида.
***
ФУТБОЛ ТАРИХИДАГИ ЭНГ ЯХШИ ВЕРСИЯ
Лионель Месси ҳозир ҳам чакки эмас. Бироқ унинг мавсум-2018|2019даги буюк версияси футбол тарихи учун эталон ҳисобланади. Рақамларни келтириш шарт эмас, аргентиналик юлдуз ўшанда ҳужумкор ўйиннинг деярли ҳар бир жабҳасида барчадан зўрлигини исботлаганди.
***
ҲАММАСИДА БИРИНЧИ, ФАҚАТ...
«Барселона» етакчиларидан бири Педрини чиндан ҳам, энг қадрланмаётган иқтидорлар қаторига қўшиш мумкин. Мисол учун, у «Олтин тўп»-2025 сўровида кучли 10таликка ҳам киритилмади. Ваҳоланки, Европанинг кучли 5та лигаси жорий мавсумига қарасак, ярим ҳимоячилар орасида айнан Педри кўплаб жиҳатлар бўйича биринчи ўринда. Дейлик, у 2025 йилги ўйинларда энг яхши футболчи бўлиш борасида ҳам рақобатдан холи.
