Мавсум бошланишидан олдин Opta Премьер-лига жамоаларининг якундаги жойлашувини башорат қилганди. Унга кўра, «Сандерленд» охирги ўрин учун номзодлар сафида эди: унинг лигада қолиш эҳтимоли атиги 34,1 фоиз бўлган. Кейинги ўринларда «Лидс» (17,8 фоиз) ва «Бёрнли» (16,6 фоиз) турарди.
Бундай тахминлар мантиқий туюларди — чунки сўнгги мавсумларда Чемпионшипдан кўтарилган ҳар бир жамоа бир йилдаёқ элитадан тушиб кетган. Аммо «Сандерленд» бу тенденцияни синдирди. Чемпионшип финалида яққол фаворит «Шеффилд Юнайтед»ни енгиб, элита йўлланмасини қўлга киритди. Энди эса АПЛда шов-шув марказида турибди.
Икки ҳафта олдин жамоа чемпионатда 2-ўринга чиқди — бу ҳатто ҳужумчи Изидорни ҳам ҳайратда қолдирди. Тўғри, кейинчалик улар 4-ўринга тушишди, лекин бу мавсум стартидаги энг катта сенсация бўлиб қолмоқда. Қолаверса, охирги турда пешқадам «Арсенал» билан жанговар дуранг қайд этди - 2:2.
Мослашувчан тактика ва янги қаҳрамонлар
Аслида «Сандерленд» катта тарихга эга, лекин имконият жиҳатдан жуда камтар клуб сифатида кўриниб келган. Жамоа 1879 йилда ташкил топган ва Англия чемпиони унвонини 6 марта қўлга киритган. Тўғри, бу анча олдин бўлган — сўнггиси 1936 йилда.
Ҳозирда Transfermarkt маълумотларига кўра, «Сандерленд» АПЛдаги энг арзон таркибли 3 жамоадан бири — 340 млн. евро. Фақат «Лидс» (316 млн.) ва «Бёрнли» (247 млн.) арзонроқ баҳоланган.
Ёзда жамоа мутлақо янгиланди: 15 нафар футболчи келди, улар учун 188 млн. евро сарфланди. Улардан 8 нафари «Челси»га қарши асосий таркибда майдонга тушишди. Бу деярли бошқача жамоа эди.
Мураббий Режис Ле Бри эса эҳтиёткорликка эмас, мослашувчанликка таянмоқда. У жамоани керак пайтда чуқур ҳимояланишга, керак пайтда эса юқори прессинг қилишга мослаган. Мавсум бошида тўрт ҳимоячи билан ўйнаган жамоа «Стэмфорд Бридж»да бешликка ўтди ва бу қарор Маресканинг режаларини тўлиқ бузди.
Энг тажрибали ўйинчи Гранит Жака жамоа руҳининг тимсолига айланган. У АПЛда 9 турдан кейин энг кўп югурган футболчи (100,83 км.) бўлиб турибди — ва бу 33 ёшида!
Дарвозабон Робин Руфс ҳам мавсум қаҳрамонларидан бири. Унинг реакцияси ва позиция танлови жамоага неча бор очко олиб келди. Ҳозир у АПЛда шот-стопинг бўйича 2-ўринда турибди (}2,5 PSxG).
Изидор — янги юлдуз
«Зенит»да ўзига жой топа олмаган ҳужумчи Уилсон Изидор АПЛда 4та гол урди ва «Сандерленд»нинг асосий тўпурарига айланди. У мавсумни захирадан бошлаб, асосий таркибдаги жой учун курашда ғолиб чиқди.
Жамоанинг уч ҳужумчиси — Изидор, Брайан Бробби ва Эльесер Майенда — турли услубдаги ўйинчилар. Бу мураббийга ҳужумда турли вариантлар яратиш имконини бермоқда. «Челси»ни айнан шу ҳужум чизиғи енгди: биринчи гол Изидор томонидан аутдан ўйналгандан кейин киритилди, ғалабани эса Шамсиддин Талби 90}6 дақиқада таъминлади.
Статистика ҳам ҳайратда
Ҳозир «Сандерленд»да 19 очко бор — Премьер-лига тарихида стартдаги 11 турда шунча очко йиғиб, лигада қололмаган дебютант бўлмаган. Шунингдек, сўнгги 17 йилда Чемпионшипдан чиққан ҳеч бир жамоа бундай старт қилмаган.
Opta бу жамоага 14-ўринни башорат қилмоқда, аммо Англияда кўпчилик уларнинг Еврокубок зонасида қолиш эҳтимолини муҳокама қилиш билан банд. Шуни ҳам унутмайлик: катта эҳтимол билан бу мавсумда АПЛдан 5та жамоа ЕЧЛга чиқади.
Хулоса: Англия сенсацияларни яхши кўради
Англия футболида ҳар йили кутилмаган қаҳрамон пайдо бўлади. Ўтган мавсум «Ноттингем Форест» 33-тургача топ-3да бўлган, аммо якунда 7-ўринга тушиб қолган. Албатта, бундай жамоалар кўпинча катта масофани босиб ўта олишмайди.
Бироқ футбол — прогнозларни ёқтирмайдиган ўйин. «Лестер» чемпионлиги ҳам шундай бошланган эди. Ким билади, эҳтимол, бу мавсумнинг «Лестер»и айнан «Сандерленд» бўлар?
Манба: championat.com,
МУҲАММАДХОН тайёрлади
