Нигериялик ҳужумчи Виктор Осимхен жаҳон футболининг энг катта юлдузлари ҳақида гап очилса, оддий мухлисга айланишдан асло тортинмайди. У Daddy Freeze нашрига берган интервьюсида буни очиқ тан олди: «Дўстларимга айтганман, агар Криштиану Роналду, Лионель Месси ёки Неймарга қарши ўйнасам, улар билан бирга суратга тушаман, албатта. Ҳаттоки, 0:10 ҳисобида ютқазсак ҳам. Гап мен жуда яхши кўрадиган чинакам афсоналар ҳақида кетмоқда!» Хуллас, Осимхен португалиялик Роналду билан учрашуви тафсилотларини ҳам баён этди.
«Наполи»да юлдуз голеадор даражасига кўтарилган нигериялик футболчининг айтишича, у 2021 йили «Ювентус»га қарши ўйинда Криштиану Роналду билан гаплашиш имкониятига эга бўлганди: «Финал ҳуштаги янграгач, тўғри Роналду ёнига бордим: «Криш, сен билан суратга тушмоқчиман». У эса муаммо йўқлигини айтди, кийиниш хонасига боришимни тайинлади. Бироқ у ерда оддий мухлисдек анча кутишимга тўғри келди. Орада Буффон мени кўриб, олдимга келди ва нима исташимни сўради. Роналдуни кутаётганимни билгач, у якка тартибда шуғулланаётганини айтди, кейин бирга ўтиришни таклиф этди. Шу тариқа шунчаки, чақчақлашдик, деярли 30 дақиқа ўтдики, Роналду чиқмади. Бутун 1 соатни кутиш билан ўтказиб юбордим, у эса машғулотдан бўшамади».
Муҳими, Осимхен ўша куни Криш билан учрашишга муваффақ бўлган: «Роналду залдан чиққанида, уни кўрганингизда эди, беихтиёр ўйлаб қолардингиз - бу 25 ёшли йигит-ку. Криш қаршисида мени кўриб, сўз қотди: «Ажойиб ўйин, шу руҳда давом эт». Шунда унга қўл узатдим. Ҳозир Роналдунинг ишларидан ҳеч ким ортиқча ажабланмайдиган бўлиб қолди. Моҳиятан теран ўйласак эса, у буюк шахс».
